Sunday, April 30, 2017

வளரட்டும் நிலைக்கட்டும் உலகெங்கும் மேதினத்தின் நோக்கங்கள் எல்லாமே

தளரட்டும் உடையட்டும் ஒழியட்டும்
தடையெனவே கிடந்தவைகள் எல்லா"மே "
வளரட்டும் படரட்டும் செழிக்கட்டும்
வாழ்விற்கு வளம்சேர்க்கும் எல்லா"மே "

நகரட்டும் விலகட்டும் மறையட்டும்
சுமையெனவே துயர்தந்த எல்லா"மே "
பரவட்டும் தொடரட்டும் பலம்பெறட்டும்
நல்லோர்க்கு நலம்சேர்க்கும் எல்லா"மே "

உடையட்டும் நொறுங்கட்டும் சிதறட்டும்
பொய்மைக்குத் துணைப்போன எல்லா"மே "
நிறையட்டும்  நிமிரட்டும் வலுக்கட்டும்
உண்மைக்கு வலுசேர்க்கும் எல்லா" மே "

கிழியட்டும் எரியட்டும் அழியட்டும்
கீழ்மைக்குத் துதிபாடும் எல்லா"மே "
வளரட்டும் உயரட்டும் நிலைக்கட்டும்
உன்னதத்தின் எழில்கூட்டும் எல்லா"மே "

உணரட்டும்  இணையட்டும் வளரட்டும்
உழைப்பவருக்கு உழைக்கின்ற எல்லா "மே "
வளரட்டும் நிலைக்கட்டும்   உலகெங்கும்
"மே "தினத்தின் நோக்கங்கள் எல்லா"மே "


(அனைவருக்கும்  மே  தின  நல்வாழ்த்துக்கள் )

Wednesday, April 26, 2017

நடு நவீனத்துவம்

தலைப்புக் கொடுத்திருக்கிறேன்

வாக்கியத்தை
முன் பின்னாய்ப்  பிரித்து
வித்தியாசமாய்
அடுக்கி இருக்கிறேன்

புரட்சி,மானுடம்,வர்க்கம்
இவையெல்லாம்
இருக்கும்படியாய்
கவனம் கொண்டிருக்கிறேன்

தவறியும்
யாப்பமைதி
அமைந்து விடாதபடி
இலக்கணம் தவிர்த்திருக்கிறேன்

கூடுமானவரையில்
எத்தனை முறைப் படித்தாலும்
புரிந்துவிடாதபடி இருக்க
அதிகம் மெனக்கெட்டிருக்கிறேன்

மிகக் குறிப்பாய்
சென்றமுறை
நீங்கள்  எழுதியதாய்ச் சொன்னதை
நல்ல கவிதை எனப் புகழ்ந்திருக்கிறேன்

அப்படியும் நீங்கள்
இதை
நல்ல நடு நவீனத்துவக் கவிதையென
ஒப்புக்கொள்ளவில்லையெனில்

உடன் மறுபரிசீலனை
செய்வதைத் தவிர
எனக்கு வேறு வழியில்லை

நான் கவிதையைச் சொல்லவில்லை

நம் உறவைச்  சொல்கிறேன்

Tuesday, April 25, 2017

ஒரு கவிக்கருவைச் சிதைத்தபடி....

கலங்கிய நீரில்
விழுந்து
மெல்ல மெல்ல
முகம் இழக்கும் நாணயமாய்

விழித்ததும்
நினைவிலிருந்து
மெல்ல மெல்லக் கரையும்
ஒரு நல்ல கனவாய்

சாலைப் பேரிரைச்சலில்
கலந்துக் கலைந்து
மெல்ல மெல்ல உயிர்த்தொலைக்கும்
ஒரு நல்ல இசையாய்

பெருந்திரளின்
அழுத்தத்தில்
மெல்ல மெல்ல ஒதுங்கும்
தர்மமாய், நியாயமாய்

யதார்த்தத்தின்
அதீத நெருக்கடியில்
மெல்ல மெல்லக் கலைகிறது
கனவுகளும் கற்பனைகளும்

அதன் காரணமாய்
உருவாக இருந்த
ஒரு கவிக்கருவை
மெல்ல மெல்லச்
சிதைத்தபடியும், கலைத்தபடியும்

Saturday, April 22, 2017

பதவியில் இருப்பவர்கள் எல்லாம்.....

பதவியில் இருப்பவர்கள்  எல்லாம்
காது  கேளாதவர்களா  ?
இல்லை கெட்டிக்காரர்களா   ?

இல்லை நாம் தான்
முட்டாள்களா
இல்லை ஏமாளிகளா   ?

"கல்வித்துறையில்  கொள்ளையை ஒழியுங்கள்
கல்விக் கொள்கையை மாற்றுங்கள் "
என்றால்

கல்விக் கடன் தருகிறோம்
கல்விக் கடனைத் தள்ளுபடி செய்கிறோம் "
என்கிறார்கள்

வேலைக்கு உத்திரவாதம் தாருங்கள்
வேலை வாய்ப்பைப் பெருக்குங்கள்
என்றால்

வேலைபெறாதோருக்கு உதவித் தொகை
வேலையற்றோரின் கடன் தள்ளுபடி
என்கிறார்கள்

சாலைகளைச் சீர்ப்படுத்துங்கள்
சாலைப் போக்குவரத்தை  மேம்படுத்துங்கள்
என்றால்

வாகனத்திற்கு மானியம்
பஸ் கட்டணச் சலுகை
என்கிறார்கள்

மது விலக்கை  அமல்படுத்துங்கள்
மதுக் கடைகளை மூடுங்கள்
என்றால்

கைம்ப்பெண்களுக்கு நிவாரணம்
தாலிக்குத் தங்கம்
என்கிறார்கள்

பள்ளி மற்றும் நெடுஞ்சாலைகளில்
மதுக்கடைகளை அகற்றுங்கள்
என்றால்

அதனை ஊருக்குள்ளும்
வீட்டருகிலும்  வைப்பதற்கு
ஆவன செய்கிறார்கள்

நீர் நிலைகளைப் பராமரியுங்கள்
நீ ஆதாரத்தைப் பெருக்குங்கள்
என்றால்

கடல் நீரிலிருந்து குடி நீர்
தெர்மாக்கோல் மூடி
என்கிறார்கள்

......................................
................................................

நிஜமாகவே
நம் கோரிக்கைகள் அவர்கள்
காதுகளில் மாறித்தான்  விழுகிறதா ?

அல்லது
 நமக்குத்தான் அவர்களுக்குப்
புரியும்படியாய் சொல்லத்தெரியவில்லையா  ?


Wednesday, April 19, 2017

யார் யார் காரணமோ அவர்கள் வாழ்க

யார் யார் காரணமோ
அவர்கள் வாழ்க

முந்தைய ராஜாராணிக்கதைகளில்
மன்னனின்
சிறு பலவீனத்தைப் பயன்படுத்தி
நாட்டை நாசகாடாக்கும்
சதிகாரர்கள் போல்

புரட்சித் தலைவியின்
ஏதோ ஒரு
பலவீனப்படுத்தைப் பயன்படுத்தி
தமிழகத்தையே சூறையாடிய
ஒரு சதிகாரக் குடும்பத்தை

சட்டமும் நீதியும் தண்டித்தும்
அடங்காது விஷ நாகமாய்
வேறு உருவில் சீறி
மீண்டும் தமிழகத்தை கொள்ளையிடத் துணிந்த
ஒரு மனச்சாட்சி அற்றக் குடும்பத்தை

உல்கின் மூத்தக் குடிமக்கள்
எனப் பெருமிதம்கொண்டத் தமிழினத்தை
உலகின் "பெரும் குடி "மக்களாக்கி
தன் ஆலைச் சரக்கு விற்பனைக் களமாக்கிய
ஒரு சுய நலக்கூட்டக் கும்பலை

அதிகார வட்டத்திலிருந்து
விலக அல்லது வெளியேற்ற
யார் காரணமோ
யார் யாரெல்லாம் காரணமோ
அவர்கள் எத்தன்மையுடையவராயினும்
அவர்கள் வாழ்க

Tuesday, April 18, 2017

தண்ணிக்கண்டத்தில் தமிழ் நாடு.....

தமிழ் நாட்டுக்கும்
பக்கத்து மாநிலம்
ரெண்டுக்கும்
தண்ணி தான் பிரச்சனை

இப்போ
தமிழ் நாடு முழுசுக்கும்
குடி தண்ணியும் பிரச்சனை

மூடின
தண்ணிக் கடையைத்
திறக்கறதுலயும்
நாளெல்லாம் பிரச்சனை

கூவத்தூர்ல
"அதுல " கிடந்து எடுத்த
முடிவுலதான்
அரசாட்சிக்கு
பெரும் பிரச்சனை

இப்ப எதுக்கு
இவங்க
தண்ணில  மிதந்து
முடிவெடுக்கப் போறாங்க ?

ஒருவேளை
அவங்களை காப்பாத்திக்கறதுக்காக
வழக்கம்போல
நம்க்குத் "தண்ணிகாட்ட " இருக்குமோ ?

ஆண்டவா
தமிழ் நாட்டை
தண்ணிக் கண்டத்துல இருந்து
காப்பாத்துப்பா

உனக்கு
ஆயிரம் ஆயிரம்
தண்ணிக் குடமெடுத்து
அபிஷேகம் செய்யுறோம்

Monday, April 17, 2017

மௌன மொழி







மௌன மொழி,பேசாமல் பேசுவது,
சொல்லாமல் சொல்வது ,இப்படியெல்லாம்
சொல்லக் கேட்டதுண்டு

அதனைஆன்மீகமீகவாதிகளின்அசட்டுப் புலம்பல்
எனக் கூடக் கருத்தில் கொண்டதுண்டுமௌன மொழி

ஆனால் இங்கு(அமெரிக்காவில் )
பதினைந்து  நாட்களுக்கு முன்பு
எங்கள் வீட்டுப் பால்கனியில் இருந்துக் கூட
புகைப்படம் எடுக்க இயலாதவாறு
பனிப்பொழிவு அத்தனைக் கடினமாக இருந்தது

என்னை முற்றிலுமாக மூடி மறைத்தபடி
ஒரு நொடி வெளியேறித்தான் இந்த புகைப்படங்களை
எடுத்தேன்

இந்தப் பனி இன்னும் எத்தனை நாள் நீடிக்கும்
எப்போது இயல்பாக நடமாடும் சூழல் வரும்
என எல்லாம் இங்கு விசாரித்துக் கொண்டிருந்தேன்
சீதோஷ்ண நிலை குறித்த அறிக்கைகளையும்
கவனித்துக் கொண்டும்தான் இருந்தேன்

இந்தச் சூழலில் வெளியில் இருந்த
செடியை மிகச் சரியாய்க் கவனிக்கவில்லை

கடந்த ஒருவாரமாய்  கொஞ்சம்
சீதோஷண நிலைமை சரியாகி வர
பால்கனி வழி அந்தச் செடிகளைப்
பார்க்க மிகஅதிசயித்துப் போனேன்

அத்தனையும் மிகப் பசுமையாய் துளிர்விட்டும்
பூத்தும் அற்புதக் காட்சியளித்துக் கொண்டிருந்தது

விஞ்ஞான முன்னேற்றத்தின் காரணமாய்
எத்தனையோ அதி அற்புதக் கருவிகளைக் கொண்டு
வருகிற வாரம் சீதோஷண நிலையில்
மாறுதல் இருக்கும் என நாம் கணித்துக்
கொண்டிருக்க, அதுவும் சில சமயம்
பொய்த்துக் கொண்டிருக்க,

இனிப் பனிப்பொழிவில்லை,நீ துளிர்க்கலாம்
பூக்கலாம் என வானம்  மௌன மொழியாய்ச்
சொன்ன உறுதி மொழி,செடிகளுக்கு
மட்டும் எப்படிக் கேட்டது ?

தட்சிணாமூர்த்தியும் சீடர்களும் போல்
வானமும் மண்ணும் பரிமாறிக் கொள்ளும்
மௌனமொழி அறியும் பக்குவம்தான்
நம் புராணக் கால ஞானிகள் கொண்டிருந்த
ஞானமா ?

மௌன மொழி குறித்தும்
பேசாமல் பேசுவது குறித்தும்
சொல்லாமல் சொல்வது குறித்தும்
மாற்று எண்ணம் மெல்ல மெல்ல வளர்வதைத்
தவிர்க்க இயலவில்லை

Friday, April 14, 2017

ஒரு போதைக்காரனின் புலம்பல்

பச்சை விளக்கைப் பார்க்கும் போதே
போதை ஏறுதே  -கால்கள்
இச்சை கொண்டு பாதை மாறி
போக ஏங்குதே

மொத்த உடம்பும் பித்தம் ஏற
ஆட்டம் போடவே-மனசில்
மிச்சச் சொச்சக் கூச்சம் கூட
விலகி ஓடுதே

வீடு போக எந்தப் பாதை
மாறிப் போயினும்- இந்தக்
கேடு கெட்ட" பாரு "அங்கே
இருந்து தொலைக்குதே

தாறு மாறா விலையைக் கூட்டி
விற்கும் போதிலும்-காசை
வீசி எறிந்து வாங்கிக் குடிக்க
மனசு தாவுதே

கடனைக் கேட்டு வட்டிக் காரன்
வந்து போனதும்-ரோட்டில்
கிடக்கப் பார்த்த மனிதர் எல்லாம்
முகத்தைச் சுளித்ததும்

நினைப்பில் வந்து தடுக்கப் பார்த்தும்
வெட்கம் இன்றியே-இந்த
வலையைக் கிழிக்கும் பலத்தை இழந்து
புலம்பித் தவிக்குதே

கிடைக்கும் தூரம் எட்டிப்போனால்
நானும் மாறலாம் -ஒரு
நடைக்கு பயந்து வீடு  நோக்கிக்
காலும் திரும்பலாம்

கேடுக் கேட்ட அரசு  இதனை
உணர  மறுக்குதே  -  எங்கள்
வீடு இருக்கும் தெருவில் புதிதாய்
திறக்க நினைக்குதே

தாயைப் போல தயவு  கொள்ள
வேண்டும் அரசுமே --கொடிய
பேயைப் போல இரத்தம் குடிக்க
நித்தம் அலையுதே

வாடி வாசல் திறக்கச் சேர்ந்த
இளைஞர் கூட்டமே --இந்தக்
கேடு ஒழிய நீங்கள் மனது
வைத்தால் போதுமே

மதுவை விற்று அரசு நடத்த
எண்ணும் கூட்டமே --உடன்
பதவி விட்டு ஊரை  நோக்கி
எடுக்கும்   ஓட்டமே     


Wednesday, April 12, 2017

அட... சாராய சாம்ராஜ்ய மன்னர்களின் அடிவருடிகளே...



அன்று
மதுரைப்  பாண்டிய ராஜனால்
ஈஸ்வரனின் முதுகில் பட்ட அடி
உலகில் உள்ளோர்
அனைவரின் முதுகிலும்
பட்டதாமே

இதை
நாத்திக வாதிகள்
ஒப்புக் கொள்வதில்லை

ஆயினும்
இன்று
திருப்பூர் பாண்டியராஜனால்
ஈஸ்வரியின் கன்னத்தில் விழுந்த அடி

எங்கள்
அனைவரின் இதயத்திலும்
இடியாய் இறங்கியிருக்கிறதே

இதை நினைக்க
அதுவும் கூட
சாத்தியமாயிருக்கச்
சாத்தியமே எனப் படுகிறது எனக்கு

அட...
சாராய சாம்ராஜ்ய மன்னர்களின்
அடிவருடிகளே
அடியைவருடுங்கள்

அழுக்குப்போக
நக்கக் கூடச் செய்யுங்கள்

அதற்காக
அவர்கள் காலே  கூட
 புண்ணாகிவிடும்படி இப்படியா ?

Tuesday, April 11, 2017

நம் காவல் துறையினரைத் தொந்தரவு செய்யாதீர்கள்...



தமிழகப்  பொது ஜனங்களே
நம் காவல் துறையினரைத்
தொந்தரவு செய்யாதீர்கள்

களவு, கொள்ளை
தகராறு,வன்முறை
செயின் பறிப்பு
கற்பழிப்பு முதலான
சிறுச்  சிறு விஷயங்களையெல்லாம் விட

சிலைப்பாதுகாப்பு
முக்கியஸ்தர்கள் பாதுகாப்பு
பொதுக்கூட்டப் பாதுகாப்பு
இவை போன்ற
தவிர்க்க இயலாத விஷயங்களை விட

இப்போது
டாஸ்மாக் வரிசை ஒழுங்குபடுத்துவது
புதுக்கடை துவங்க நேரும்
தடைகளைத் தகர்த்தெறிவது
முதலான  அத்தியாவசியப் பணிகள்
அவர்களுக்கு அதிகம் இருக்கிறது

மிக மிகக் குறிப்பாகப்
பெண்களிடம் தங்கள்
புஜ பலப்  பராக்கிரமத்தைக் காண்பிப்பது உட்பட

என்வே
அப்பாவித்  தமிழ்  ஜனங்களே

சட்டம் ஒழுங்கினைக்
காப்பதுதான்
அவர்களுக்கிட்டப்பணி
என்பதனை

அவர்கள் மறந்தே
வெகு காலமாகிவிட்டது

அவர்கள் பிரிட்டிஷ்  போலிஸாராகி
வெகு நாளாகிவிட்டது

எனவே அதைஅவர்களுக்கு
ஞாபகப்படுத்தி
அவர்களைக்  கஷ்டப்படுத்தாதீர்கள்
அதனால்
நீங்களும் கஷ்டப்படாதீர்கள்

எனவே
ஊமை ஜனங்களே
இனியேனும்  

நம் காவல் துறையினரைத்
தொந்தரவு செய்யாதீர்கள்



வானம் பார்த்து மண்ணில் நடக்கும் கற்பனை மனோபாவம்...

நகத்தால் கீறி
முடிக்க வேண்டியவைகள் எல்லாம்

இப்போது

கோடாரியினைக் கொண்டு
முடிக்கவேண்டி இருப்பது எதனால் ?

சாக்கடை அடைப்பென்றால்
சட்டசபையிலும்

பாதாள சாக்கடை அடைப்பெனில்
பாராளுமன்றத்திலும்

நம் தெரு மதுக்கடை மூடவேண்டுமெனில்
உச்ச நீதி மன்றத்திலும்

முறையிட்டு முடிக்கும்படி
நம் தலையெழுத்து ஆனது ஏன் ?

வேரில்
மண்ணில்
நீரூற்றி
மரம் வளர்க்க நினையாது

இலையில்
கிளையில்
நீரூற்றி
வளர்க்க நினைப்பது போல்

நம்மில்
நம் பகுதியில்
நம் தலைவனைத்
நாமே தேட முயலாது

தலைவர் குடும்பம் மூலம்
பிரபலஸ்தர்களின்  மூலம்
 நம் தலைவர்களைத்  தேடுவதாலா ?

நினைவில் எப்போதும்
நம் பகுதிக்குறித்த
சிந்தனையது
சிறிதும் இல்லாது

ஐ. நா சபைகுறித்தும்
அமெரிக்க ஜனாதிபதி குறித்தும்
அதிகம் பேசி
அறிவாளிபோல் அலட்டி கொள்வதாலா ?

மொத்தத்தில்
அண்ணா சொன்னது போல்

"கூரையேறி
கோழி பிடிக்க இயலாதவன்
வானமேறி
வைகுண்டம் ஏக நினைப்பதுபோல்

வானம் பார்த்து
மண்ணில் நடக்கும்
கற்பனை மனோபாவம்
நம்முள் வளர்ந்துத் தொலைத்ததாலா ?

முன்புபோல் அல்லாது
இப்போதெல்லாம்

நகத்தால் கீறி
முடிக்க வேண்டியவைகளை  எல்லாம்

ஏன்

கோடாரியினைக் கொண்டு
வெட்டித்தொலைக்க வேண்டி இருக்கிறது  ?


Monday, April 10, 2017

தேர்தல் ஆணையர் ஐயா

தப்புப் பன்னீட்டீ ங்களே
ஆணையர்  ஐயா
தப்புப் பன்னிட்டீங்களே

தப்புக் கணக்குக்கும்
கணக்குத் தப்புக்கும்
வித்தியாசம் தெரியாம
தப்புப்பன்னிட்டீங்களே

எங்கள் தொப்பி ஐயா
தேர்தல் செலவுக்குப் பணமில்லாம
கஷ்டப்படரானுன்னு

தொகுதி மக்கள்
ஆளுக்கு நாலாயிரமாப் போட்டு
மந்திரி மூலமா கொடுத்தப் பணமய்யா

வரவை செலவா
செலவை வரவா
தப்பா எழுதினதாலே
உங்களுக்குத்
தப்பாத் தெரியுதையா

இது
கணக்குத் தப்பையா
தப்புக் கணக்கில்லே ஐயா

இப்ப
டாக்டர் ஐயா
குடக் கூலிக்கு கொடுத்தது
ரேகைக்கு இல்லேன்னு
சொன்னாருப் பாத்தீங்களா

அப்படி எங்க
வக்கீல் ஐயாவும்
கணக்குத் தப்பைப்  பத்தி
மிகச் சரியா
நாளைக்குச் சொல்வாரையா

ஒரு கடைக் கோடி
தொண்டன் எனக்குத்
தெரிஞ்சது கூடத் தெரியாம

அதுக்குள்ள
அவசரப்பட்டு
தப்புப் பன்னிட்டீங்களே

தப்புப் பண்ணிட்டீங்களே
ஆணையர் ஐயா
தப்புப் பன்னிட்டீங்களே 

Sunday, April 9, 2017

தேர்தல் சடங்கு

உப்புச் சப்பற்று  இருந்த
எங்கள் ஊர்
சட்டெனக்  கார நெடி கொள்ளும்

மூத்திரச் சந்துகளெல்லாம்
ஒளிபெற்று
மணக்கத் துவங்கும்   

கொடிகளின் சலசலப்பில்
இருபதிலிருந்து எட்டான
ஜாதியப்  பிரிவுகள்

மீண்டும்
முன்போல்இருபதாகி
வன்மம் கூட்டும்

முன்பு எத்தனைமுறை
காவடிஎடுத்தும்
 திரைவிலக்காத
"மூலவர்களெல்லாம்"

"உற்சவ மூர்த்திகளாக" உருமாறி
எங்கள்குடிசை வாயில்களில்
நாளெல்லாம் தவமிருப்பர்

கேட்டது மட்டுமல்லாது
கேளாததுதம் தருவதாய்ச் சொல்லி
எங்களைக்  கிறங்கவைப்பர்  

கொள்ளையடித்ததுதானே
கொடுக்கட்டும் என
துண்டுக்குப்பதில் வேட்டியையே
விரித்துக் காத்திருக்கும்
 "கெட்டிக்கார" மக்கள் கூட்டம்

கொடுக்கவா செய்கிறோம்
விதைக்கத்தானே செய்கிறோம் என
அதிகாரத் துணையோடு
இரவில் வீடுவீடாக
"கவர்" கொடுத்துப்போகும்
"வெறி" பிடித்த வேட்பாளர்கள் கூட்டம்

என்னைப்போல்
சில அ ணில்களும் பட்டாம்பூச்சிகளும்
நேரம் சரியில்லை என
வீதி விட்டு ஒதுங்கி
வீட்டு மூலைகளில்
'முக்காடிட்டு' அமர

கண்ணில் படாது
எங்கோ கிடந்த பாம்புகளும் ஓநாய்களும்
பொந்து விட்டு வெளியேறி
வீதிகளில்
"விட்டேத்தியாய்" உலா வரும்

துண்டு இழந்து வேட்டி இழந்து
அம்மணமானது தெரியாமல்
வார்த்தை ஜாலங்களில்
வான வேடிக்கைகளில்
மெய் மறந்து நிற்பர்
'திருவாளர்' பொதுஜனம்

அவ்வப்போது
"நானே பெரும்பூதம்
நானே கருப்பணச்சாமி " என
உறியடித்து
தீவட்டி சாட்டைகளோடு
ஊர் மிரள
ஊர் வலம் வந்துப்  பின் . . . .

வலம் வந்துப்  பின்

வந்துப் பின் 

பின்....

ஒருபெரிய  வீட்டுச்  சடங்குபோல்
தேர்தல் நடத்தி
முடிவினைச் சொல்லி
மலைஏறிப் போகும்
அதிகாரம் அதிகம் கொண்ட
தேர்தல் ஆணையம்

கார நெடி  கண்ட
எங்கள் ஊர்
மீண்டும்
உப்புச் சப்பற்றுப் போக

ஒளிபெற்று
மணந்த தெருக்களெல்லாம்
மீண்டும்
மூத்திர நாற்றம் கொள்ளும் 

   

Saturday, April 8, 2017

யார் மார்க்கண்டேயன் ?

அலுவலக மனக்கடி
போக்குவரத்து மற்றும்
நேர நெருக்கடி
மனச் சோர்வைக் கூட்ட...

உடல்வலி
சிறுநீர் மற்றும்
முலைக்காம்பின் அழுத்தம்
மூச்சிரைக்க வைக்க

இல்லம் நுழைந்ததும்
ஸோபாவில்
மெல்லச் சரிகிறேன் நான்

பாட்டியின் கொஞ்சலுக்கு
செப்புச் சாமானின் சப்தத்திற்கு
மயங்கியதாய்

நடித்துக் கொண்டிருந்த செல்லம்
சட்டெனத் தாவி
என்னைக் கட்டிக்கொள்கிறது
நான் அழுத்தமாய் அணைத்துக் கொள்கிறேன்

மெல்ல மெல்ல
உடல்பாரமும்
மனப்பாரமும்
குறைய்த் துவங்குகிறது

"தாவரதப் பாரேன்
சிவலிங்கம் பார்த்த
மார்க்கண்டேயன் மாதிரி "
என்கிறாள் பாட்டி

எனக்கு குழப்பமாய் இருக்கிறது
இருவரில்
யார் சிவலிங்கம் ?
யார் மார்க்கண்டேயன் ?

Friday, April 7, 2017

வரித்துறை ரெய்டும் எதிர் விளைவுகளும்...

ரெய்டு நாடகம் அரங்கேறிக் கொண்டிருக்கிறது

ஓட்டு எண்ணிக்கைக் காட்டி
மொத்தமாய் வாங்கியவன்

"நல்ல வேளை வாங்கிவிட்டேன்
தேர்தலைத் தள்ளிவைத்தால்
மறுமுறையும் தருவார்கள்தானே "
எனஆவலாய்க் கேட்கிறான்

வாங்கக் காத்திருப்பவன்

"அதற்குள் இவர்களுக்கென்ன கொள்ளை
இத்தனை நாள் பொறுத்தவர்கள்
இன்னும் சில நாள் பொறுத்தால் என்ன ?"
எனப் பொருமுகிறான்

பணம் கிடைக்க வாய்ப்பில்லாத
மாற்றுக் கட்சிகாரன்

"ஒத்திவைத்தால்
இன்னும் செலவழிக்க வேண்டிவரும் தானே
அப்படியாவது அவர்கள் கொள்ளைப்பணம்
கரைந்து தொலையட்டும் "
என வயிறெரிந்துத்  திரிகிறான்

வேறு தொகுதிக்காரனோ
வானம் பார்க்கும்
கரிசல்காட்டுக்காரன் மாதிரி

மருத்துவனையில் சேர்க்கப்பட்ட
தங்கள் பிரதிநிதி குறித்து
"நல்ல சேதி ஏதும் உண்டா ? " என
விசாரித்துச் சலிக்கிறான்

இந்தப் பித்தலாட்ட அரசியல்வாதிகளின்
அரிச்சுவடி அறிந்தவர்களோ
"இதுவும் ஒரு பாம்பு கீரிச்சண்டைப் பம்மாத்து "
என முகம் சுழித்துக் கடக்கின்றனர்

தொலைக்காட்சி மற்றும்
செய்தி ஊடகங்களோ

மற்றுமொரு இலை  விழும்
சப்தம்கேட்டு ஓடும்
"அதுவாய் "
செய்தி சேகரிக்க ஓடிக்கொண்டிருக்கின்றன

மீண்டும் ஒருமுறை
ரெய்டு நாடகம்
சுவாரஸ்யமாய் அரங்கேறிக் கொண்டிருக்கிறது

Thursday, April 6, 2017

அவ நம்பிக்கை கொள்ளத் துவங்குகிறது நம்பிக்கை...

எது இருக்கிறது
எப்படி இருக்கிறது
என்பதைவிட
"எதில் "இருக்கிறது என்பதிலும்

யார் இருக்கிறார்
எப்படி இருக்கிறார்
என்பதைவிட
"யாருடன்" இருக்கிறார் என்பதிலும்

எதைச் சொல்கிறான்
எப்படிச் சொல்கிறான்
என்பதைவிட
"எவர்" சொல்கிறார் என்பதிலும்

ஏன் தருகிறான்
எதற்குத் தருகிறான்
என்பதைவிட
"எவ்வளவு" தருகிறான் என்பதிலும்

அதிகக் கவனம்  கொண்டவர்கள்தான்
முடிவைத் தீர்மானிப்பவர்களாக இருக்க
அனைத்துத் துறைகளிலும் நிலைகளிலும் 
கூடுதல் எண்ணிக்கையில் இருக்க

அவ நம்பிக்கை
கொள்ளத் துவங்குகிறது
தர்மத்தை நம்பிய நம்பிக்கை

மெல்ல மெல்ல
அதர்மத்திற்கு
தலைவணங்கத் தயாராகிறது
நம்பிக்கையை இழந்த  தர்மமும்...

Wednesday, April 5, 2017

புகழுடம்பு

தேடிநித்தம் சேர்த்ததெல்லாம்
தெருக்குப்பை ஆகிவிடும்
தேடியோடிப் படித்ததெல்லாம்
தொலைந்தெங்கோ  ஓடிவிடும்
கூடியாடிக் களித்ததெல்லாம்
வெறுங்கனவாய் மாறிவிடும்
தேடிவந்து காலனவன்
மூச்சடைக்க நடந்துவிடும்

வெளியோடி உள்ளோடி
உயிரதற்கு ஆதரவாய்
ஒலியதனைத் தினம்கடத்தும்
ஒப்பற்றச் சாதனமாய்
நொடிதோரும் உழைத்திட்ட
வளியதுவும் திசைமாறும்
வெளியோடு நின்றுடலை
பிணமாக்கி சுகம்காணும்

தினமுலவி வாழ்வதற்கும்
நிம்மதியாய் சாய்வதற்கும்
தினந்தோரும் வகைவகையாய்
தின்றுவுயிர் வளர்ப்பதற்கும்
மனமிளகித் தாய்போலத்
தனைத்தந்த நிலமகளும்
மனங்கெட்டு அரக்கியாகி
உடல்தின்னத் துணிந்துவிடும்

நதியாகித் தினமோடி
நாடெல்லாம் செழிப்பாக்கி
தவிப்பெடுத்த உயிரனைத்தின்
தாகமதை தினம்தீர்த்த
அதிமதுர நீரதுவும்
நிலைமாறும் முகம்மாறும்
பொதியான பிணம்கழுவும்
புழக்கடைநீர் போலாகும்

உடல்நலத்தைத் தினம்காக்கும்
உணவாக்க உறுதுணையாய்
கசடுயெனத் தினம்சேரும்
கழிவழிக்கப் பெருந்துணையாய்
உடனிருந்த பெருந்தீயும்
கொண்டகுணம் விட்டுவிடும்
உடலெரித்துப் பசியடக்கப்
பேராசைக் கொண்டுவிடும்

நான்கினையும் உள்ளடக்கி
ஏதுமில்லை என்பதுபோல்
காண்பதற்குத் தெரிந்தாலும்
கடவுள்போல் யாதுமாகி
ஆண்டுவரும் வெளியதுவும்
அரக்ககுணம் கொண்டுவுடல்
தாண்டிவரும் உயிரதனை
விழுங்கிடவே தினமலையும்

உடலோடு உயிரிருக்க
உள்ளன்பின் துணையோடு
உலகத்தார் மேன்மையுற
உழைக்கின்ற உழைப்பொன்றே
உடல்விட்டு உயிர்பிரிந்தும்
உலகுவிட்டு மறையாது
புகழுடம்பு எடுத்திங்கு
எந்நாளும் நிலைத்திருக்கும்

Sunday, April 2, 2017

தரவரிசை...நாலாந்தரம் ..

"நாலாந்தரம் என்பதென்ன "
விள்க்கம் கேட்கிறான் நண்பன்

"நல்லதை
நல்லவிதமாகக் கொடுப்பது
முதல் தரமெனச் சொல்வதும்

நல்லதை
மோசமாகக் கொடுப்பது
இரண்டாம் தரமெனச் சொல்வதும்

நல்லதல்லாததை
மோசமாகக் கொடுப்பது
மூன்றாம் தரமெனச் சொல்வதும்
புரிகிறது

அது என்ன
நான்காம் தரம்
அதுவும் மூன்றைவிட
மிக மோசமானதாய்..."  

நல்ல கேள்வியாய்ப்படுகிறது எனக்கும்

நான் இப்படிச் சொன்னேன்

"அரசியல், சினிமா,பண்பாடு
கலாச்சாரம் மற்றும் இலக்கியம் என
அனைத்திற்கும்பொருந்தும்படியாய்
சொல்லட்டுமா " என்கிறேன்

"முடிந்தால் சுருக்கமாகச் சொல் " என்றான்

"நல்லதல்லாததை
மிகச் சிறப்பாகத் தருவது
அதுவும்
நாம் விரும்பும்படியாகவும்
நாம் படிப்படியாய்
நம்மையறியாது அதற்கு நாசமாகும்படியாகவும்"
என்கிறேன்

அவன் யோசிப்பதுப் புரிந்தது

ஒருவேளை ஒப்புக்கொள்ளக் கூடும்

Saturday, April 1, 2017

எளிமையுடன் நல்லதையே எழுதினால் போதும்

ஒருஏக்கர் நிலத்தினிலே
வீடும் வேண்டாம்- தூக்கம்
வாராம இரவெல்லாம்
தவிக்கவும்  வேண்டாம்

ஒழுகாத ஒருவீடு
இருந்தா போதும் -அதுல
கும்பகர்ணன் போலனித்தம்
அசந்தா போதும்

ஒருமூட சோத்துநெல்லு
வேணவே வேணாம்-வயிறு
பசிக்காம கொறிக்கிச்சுகிட்டு
 கிடக்கவும் வேண்டாம்

ஒருபொழுது சோறுதண்ணிக்
 கூடப் போதும்-தினமும்
பசியெடுத்து ருசித்துத் தின்னா
 போதும் போதும்

பட்டுச்சொக்கா போட்டிக்கிட்டு
மினுக்கவும் வேண்டாம்-அதுக்கு
ஏத்தாப்பல செலவழித்துத்
தவிக்கவும் வேணாம்

கட்டுச்செட்டா ரெண்டுடுப்பு
இருந்தா போதும்-பார்ப்போர்
மதிக்குமாறு உடுத்தினாலே
போதும் போதும்

தலைவனாக தலைநிமிர்ந்து
 நடக்கவும் வேண்டாம் -அதைத்
தக்கவைக்கப்  பித்தலாட்டம்
செய்யவும் வேண்டாம்

நிலைகுலையா மனிதனாக
உலவினால் போதும்-ஊரில்
தெரிஞ்சசனம் மதித்தாலே
போதும் போதும்

கவிஞனென்று ஊருலகே
போற்றவும் வேண்டாம்-தினமும்
அதுக்காக எதைஎதையோ
எழுதவும் வேண்டாம்

எளிமையுடன் நல்லதையே
எழுதினால் போதும்-அதுக்கு
கிடைக்கின்ற மதிப்பதுவே
போதும் போதும்

Friday, March 31, 2017

காலன் நடுவராக...

அதீத முயற்சியுடன்
பயிற்சியிலிருக்கிறான்
அந்தப் படைப்பாளி

பட்டுப் பட்டுப்
பெற்றஅனுபவ ஞானமும்
கற்றுக் கற்றுத்
தேர்ந்த மொழி அறிவும்
பயிற்சியாளர்களாக

அதீத அக்கறையுடன்
பயிற்சியிலிருக்கிறான்
அந்தப் படைப்பாளி

காலன் நடுவராக
காலம் போட்டியாளனாக
வாசகர்களே பார்வையாளர்களாக

நடைபெற இருக்கும்
அந்த இறுதிப் போட்டிக்கு

அதீத விழிப்புடன்
பயிற்சியிலிருக்கிறான்
அந்தப் படைப்பாளி

இறுதிப் போட்டிக்கான
நாளும் நேரமும்
தெளிவாகத் தெரியவில்லையாயினும்.....

அதனை முடிவுசெய்யும்
அதிகாரம்
தன்னிடம் இல்லையென்றாலும்

துளியும் சோர்வின்றி
தொடர்ந்து பயிற்சியிருக்கிறான்
அந்தப் படைப்பாளி


Thursday, March 30, 2017

முகமதியரான மனுஷ புத்திரரே

எப்போதும்
இருபுறமும் வெட்டத்தக்க
கத்தியாகவே இருங்கள்
அதுவே பிழைக்கும் வழி

எப்போதும்
இருவரும் ஏற்கத்தக்க
ஆசாமியாகவே இருங்கள்
அதுவே ஜெயிக்கும் வழி

பொதுவெளியில்
அனைவரும் ஏற்கவேண்டுமெனில்
"மனுஷ புத்திரனாய் "இருங்கள்
அதுவே நிலைக்கும் வழி

வீடுகிடைக்கவில்லையெனில்
சங்கடப்படாது உடனே
"முகமதியராய் "முகம் காட்டுங்கள்
அதுவே அரசியல் மொழி

"இந்து "வெனவே தனக்கு
பெயர்வைத்துக் கொண்டு
மதம் கடந்ததைப் போல்
காட்டிக் கொள்பவர்களுக்கு

உங்கள் நாடகம்
நிச்சயம் கைகொடுக்கும்
அதைப்போலவே
நிச்சயமா உங்களுக்கும்

என்வே....
மனுஷபுத்திரரான முகமதியரே
முகமதியரான மனுஷபுத்திரரே

எப்போதும் என்றேன்றும்
இருபுறமும் வெட்டத்தக்க
கத்தியாகவே தொடருங்கள்
அதுவே என்றும் பிழைக்கும் வழி

Wednesday, March 29, 2017

கவிதையின் சிறப்பு

விதையினைப் பொறுத்து மட்டுமல்ல
அதன் வளர்ச்சி
அதுவீழும் நிலம் பொருத்தும்தான்

உயிரினைப் பொறுத்து மட்டுமல்ல
அதன் இயக்கம்
அதைத்தாங்கும் உடல் பொறுத்தும்தான்

அழகினைப் பொறுத்து மட்டுமல்ல
அதன் பெருமை
அதனை ஆராதிப்போர் மனம் பொறுத்தும்தான்

நதியினைப் பொறுத்து மட்டுமல்ல
அதன் புனிதம்
அதுபாயும் ஸ்தலம் பொறுத்தும்தான்

கடவுளைப் பொறுத்து மட்டுமல்ல
அதன் கீர்த்தி
அது உறையும் கோவில் பொறுத்தும்தான்

................................................
...............................
..................................................

கவிதையைப் பொறுத்து மட்டுமல்ல
அதன் சிறப்பு
அதனை இரசிப்போர் தரம் பொறுத்தும்தான்

திருமங்கலமும்..ஆர்.கே நகரும்

பிரியாணிக்குச் சரியாகி
துட்டுக்கு ஓட்டு என்றாக்கி
தமிழக தேர்தல் அகராதியில்
"திருமங்கலம் ஃபார்முலா"என ஓர்
அமங்கலச் சொல்லை
அரங்கேற்றிய அசிங்கம் இன்னும்
நாறிக்கொண்டே இருக்கிறது

எத்தகைய கொடிய சாபமெனினும்
விமோட்சனம் என ஒன்று
நிச்சயம் உண்டு

எத்தகைய கொடிய நோயாயினும்
அதனைத் தீர்க்க மருந்தொன்று
நிச்சயம் உண்டு

அதற்கொரு காலச் சூழலும்
கால அவகாசமும்
நிச்சயம் வேண்டும்

அது இப்போது
ஆர்.கே நகருக்கு வாய்த்திருக்கிறது

"செய்வீர்களா..செய்வீர்களா "
என புரட்சித் தலைவி
கேட்ட கேள்விக்கு நல்ல பதிலாக

"வைத்துச் செய்ய ஒரு
நல்ல வாய்ப்பை
தேர்தல் ஆர்.கே நகர மக்களுக்கு
அழகாய்த் தந்திருக்கிறது

ஆர். கே நகர்
அரசியல் முதிர்ச்சியில்
டி.கே என்றாகுமா ?

ஆர்.கே நகர்
தரும் தீர்ப்பினில் தமிழகம்
ஓ.கே என்றாகுமா ?

திருமங்கல்ம் ஃபார்முலா எனும்
ஒரு அவச் சொல்லுக்கு
மாற்றுச் சொல்லாக

ஆர்.கே நகர்ஃபார்முலா எனும்
ஒரு மங்கலச் சொல் ஒன்று
இனிதே அரங்கேறுமா ?

கேள்விகளுக்கு
நல்ல பதில் வேண்டி

ஆர்வமுடனும்
ஆசையுடனும்
உங்களைப்போலவே
நானும்.....

Tuesday, March 28, 2017

எனவே .....

சப்தம் செய்யாதிருங்கள்

குழந்தை விளையாடிக் கொண்டிருக்கிறது

பாதுகாவலனாகத்தான் இருக்கிறேன்
என்றாலும்
உரிமை கொண்டாடாது
ஒருபார்வையாளனாய்
அதன் விளையாட்டை
இரசித்துக் கொண்டிருக்கிறேன்

குழந்தையும்
இயல்பாய் அழகாய்
அதன் போக்கில்
அது விளையாடிக் கொண்டிருக்கிறது..


இடையூறு செய்யாதிருங்கள்

கவிதைஉருப்பெற்றுக் கொண்டிருக்கிறது

படைப்பாளியாகத்தான் இருக்கிறேன்
என்றாலும்
அதிக உரிமை கொள்ளாது
ஒருரசிகனைப்போல்
அதன் உருமாற்றத்தை
இரசித்துக் கொண்டிருக்கிறேன்

கவிதையும்
மிக இயல்பாய் அழகாய்
அதன் போக்கில்
தன்னை எழுதிக் கொண்டிருக்கிறது

எனவே........

பிரம்மப்பிரயத்தனமின்றி....

காதலின்  மோகத்தில்
காதலன் மட்டுமே
காதலியை மெல்ல மெல்ல
உரச முயல்கிறான் எனக்
காதலித்தறியாதவன் கறுவ

விலகுவதுபோல் நடித்து உரசி
காதலனை உசுப்பேற்றுவதே
காதலிதான் என உணர்ந்து
அக்காட்சியைக்கண்டு இரசிக்கிறான்
காதலை ஆராதிப்பவன்

பிரசவகால உச்சத்தில்
சக்தி அனைத்தையும் திரட்டி
சிசுவினைப் புறம் தர
தாயவள்  மட்டுமே
பிரயத்தனப்படுவதாய்
மகப்பேறற்றவள் விளம்பி வைக்க

இனியும் தங்க இயலாதென
வெளிக் கிளம்பும் சிசுவின்
அதீத முயற்சியுமின்றி
சுகப்பிரசவம் சாத்தியமில்லையென
சத்தியம் செய்கிறாள்
மக்களைப் பெற்ற மகராசி

மனச்சிப்பிக்குள் துளியாய்
மகிழ்ந்து விழுந்த கரு
அற்புதக் கவிதையாய்
உருகொண்டு வெளியேற
முழுமுதற்காரணம்
கவிஞனே என வாதிடுகிறான்
ஒரு மெத்தப் படித்தப் பண்டிதன்

பூரணமடைந்த கவிதை
இனி நம் இடம் இதுஇல்லையென
வெளியேறச் செய்யும்
பிரம்மப்பிரயத்தனமின்றி
கவிபிறக்கச் சாத்தியம்
சத்தியமாய் இல்லையென்கிறான்
ஒரு கவித்துவம் புரிந்த பாமரன்  

Sunday, March 26, 2017

எழுத்து மட்டுமே எதையும் சாதித்துவிடும் எனும்....

அழுந்தக் கீறிக் காயப்படுத்தி  
கவனம் திருப்புவதில்
எனக்கு உடன்பாடில்லை

இப்படிச் செய்வதில்
கவனம் காயத்தில் தொடரவே
சாத்தியம் அதிகம்

மெல்லத் தடவிச் சுகப்படுத்தி
கவனம் கவர்வதிலும்
எனக்கு உடன்பாடில்லை

இப்படிச் செய்வதில் சுகத்தில்
இன்னும் விழிமூடவே
சாத்தியம் அதிகம்

கவனம் திருப்பக்
கையோசை எழுப்பும்
ஒரு கிராமவாசியைப் போல

கரைகடக்க முயல்பவனுக்காய்
காத்திருக்கும்
ஒரு சிறு கலம்போல

அடர்காட்டில் அலைவோனுக்கு
வழிகாட்டும்
ஒருசிறு ஒளிக்கீற்றுப் போல

அலைவோனுக்கும்
முயல்வோனுக்கும் மட்டுமே
உதவும்படியாய்

என் எண்ணமிருக்கும்படியாய்
என் எழுத்திருக்கும்படியாய்
எழுதிடவே நாளும் முயல்கிறேன்

மிகத் திண்ணமாய்.....

மாற நினைப்பவனுக்கு மட்டுமே
எழுத்து ஒரு வழிகாட்டியாய்
இருக்கச் சாத்தியம் என்பதால்

மாறியவனுக்கு மட்டுமே
எழுத்து ஒரு உரமூட்டியாய்
இருக்கச் சாத்தியம் என்பதால்

எழுத்து மட்டுமே
எதையும் சாதித்துவிடும் எனும்
மூட நம்பிக்கை இல்லை என்பதால்...

அழுந்தக் கீறிக் காயப்படுத்தி
கவனம் திருப்புவதிலும்
எனக்கு   உடன்பாடில்லை

மெல்லத் தடவிச் சுகப்படுத்தி
கவனம் கவர்வதிலும்
எனக்கு  உடன்பாடில்லை

இந்த எழுத்து..

எப்போதும்சுவாரஸ்யம் தராது
என்றும்வெகுஜன மனம் கவராது
என்ற போதிலும் ...



தலைமுறையும் இடைவெளியும்

உரிமைகளின் எல்லைகள்
குறித்துச் சிந்தனைகொள்ளாது
உறவு கொண்டாடும்
ஒரு தலைமுறைக்கும்

உரிமைகளின் எல்லையிலேயே
கவனம் கொண்டு
உறவு கொள்கிற
ஒரு தலைமுறைக்கும்

இடையினில்

என்னசெய்வதென்று அறியாது
அன்றாடம்
பரிதவித்துத் திரிகிறது
பாசமும் நேசமும்....

வார்த்தைகளின் அர்த்தங்களில்
கவனம்  கொள்ளாது
ஒட்டி உறவாடும்
ஒரு தலைமுறைக்கும்

அனைத்து வார்த்தைகளுக்கும்
அர்த்தம் தேடி
அமைதி இழக்கும்
ஒரு தலைமுறைக்கும்

இடையினில்

என்னசெய்வதென்று அறியாது
அனுதினமும்
புலம்பித் திரிகிறது
உணர்வும் உறவும்...

Wednesday, March 22, 2017

அதிகாரமற்ற அதிகாரியின்.....



அதிகாரபலமற்ற அதிகாரியின்
ஆ ணைக்கு அடங்காது
நமட்டுச் சிரிப்புச் சிரிக்கும்
கடை நிலை ஊழியனாய்..

வெப்பமற்ற சூரியனின்            
வெளிச்சத்திற்கு அடங்காது
பளீரெனச் சிரிக்கிறது
வெண்பனி எங்கும்...

                                                   நிலைமை இப்படியே
                                                  நிச்சயம் தொடராது
                                                 என்னும் நம்பிக்கையுடன்
                                                 மெல்ல நகர்கிறான் கதிரவன்

"அப்போது பார்க்கலாம்"
என அசட்டுத் துணிச்சலுடன்
பரவிச் சிரிக்குது
வெண்பனி எங்கும்.    

                                             ஒருவகையில்
                                             மக்களின் ஆதரவற்று
                                             பதவியில் தொடரும்
                                             அமைச்சர்கள் போலவும்

ஆடும்வரை ஆடட்டும்
தேர்தல்வரட்டும்
 பார்க்கலாம்  என நினைக்கும்
தமிழக மக்கள் போலவும்



மறைவாய் நமக்குச் சொல்லிப் போன வாழ்க்கை ரகசியம்...

சொட்டு நீரைக் கூட வீணே
விட்டு விடாது-அதைத்
திட்டம் போட்டுச் சேர்க்கும் முறையை
அறிய முயல்வோம்

சட்டம் போட்டு அரசு இதனைச்
செய்ய விடாது-நாமே
இஷ்டத் தோடு இதனைச் செய்து
இன்னல் களைவோம்

ஒட்ட ஒட்டக்  கறந்த போதும்
கன்றுக் கெனவே-மடியில்
கஷ்டப் பட்டுப்  பாலை ஒதுக்கி
கொடுக்கும் பசுவென

வெட்டி வெட்டிக்  காடு தன்னை
அழிக்கும் போதிலும்-நாளும்
வெக்கை கூட்டிப்  பசுமைக் குடிலை
குலைத்தப் போதிலும்

பட்டம் பார்த்து மழைக் கொடுக்கத்
திணரும் இயற்கையை-இனியும்
கஷ்டப் படுத்திக் கறக்கும் செயலை
குறைக்கப் பழகுவோம்

கடவுள் வாழ்த்துப் பாடி முடித்த
வள்ளுவ னவனுமே-அடுத்து
மறந்தி டாது வானின் சிறப்பைச்
சொல்லிச் சென்றது

மறைவாய் நமக்குச் சொல்லிப் போன
 வாழ்க்கை ரகசியம் -இதை
மறந்து  விட்டால் அழிவு நமக்குச்
சர்வ நிச்சயம்

Friday, March 17, 2017

அறியாமையில் விளைந்த குழப்பம்

சென்ற முறை அமெரிக்கப்பயணத்தின் போது
சென்னையில் கொஞ்சம் வேலை இருந்ததால்
சென்னை வரை காரிலேயே வந்துப் பின்
விமானம்பிடித்தோம்

இந்த முறை சென்னையில் வேலையில்லாததாலும்
கூடுதலாக ஆறு மணி நேரக் கார் பயணம் கூடுத்ல்
அலுப்பைச் சேர்க்கும் என்பதாலும் மதுரையிலிருந்தே
விமானம் மூலம் கிளம்பிவிடுவது என முடிவெடுத்து
டிக்கெட்டும் எடுத்து விட்டோம்

கிளம்புகிற தினத்திற்கு முதல் நாள் காலை திடுமென
உடனெடுத்துச் செல்லும் பெட்டி எண்ணிக்கை குறித்தும்எடை குறித்தும் ஒரு சிறு குழப்பம்

குழப்பதிற்குக் காரணமுமிருந்தது

சென்ற முறை அமெரிக்காவிலிருந்து திரும்பியதும்
விமானத்திலேயே மதுரை திரும்பிவிடலாம் என
டிக்கெட் புக் செய்ய முயல அவர்கள் உள்ளூர்
விமானத்தில் ஒருவருக்கு ஒரு பெட்டிதான் எனவும்
அதுவும் பதினைந்து கிலோவுக்கு மேல்
இருத்தல் கூடாது என்றும் அப்படி இருப்பின்
கூடுதல் எடைக்கு கிலோவுக்கு ஐநூறு ரூபாய்
கூடுதல் கட்டணம்செலுத்த வேண்டும் எனவும்
திட்டவட்டமாகச் சொல்லிவிட்டனர்

எங்களிடம்   வெளி நாட்டுப்பயணத்திற்கு
அனுமதிக்கிறபடி22 கிலோஎடையில்
இரண்டு பெட்டிகள்இருந்ததால் கார் பயணமாகவே
மதுரை வந்து சேர்ந்தோம்

இந்தமுறையும் அப்படி ஏதும் இருக்குமா என்கிற
குழப்பம் வர , முதல் நாளே அந்த
விமான அலுவலக்த்தில்பணிபுரிகிறவரிடம்
கேட்க முயல அவரைத் தொடர்பு
கொள்ள இயலவில்லை

நானும் அப்படி ஏதும் இருந்தால் தொடர்ந்து
பயணிக்கிற பெண்ணும் மாப்பிள்ளையும் ஞாபகப்
படுத்தி இருப்பார்களே என அலட்சியமாக
இருந்து விட்டேன்

மறு நாள் காலையில் எத்ற்கும் அந்த விமான
அலுவலக்த்தில்பணி புரிகிறவரிடம்
கேட்டு வைக்கலாமே என கேட்டு வைக்க
அவர் திட்டவட்டமாக" ஒருவருக்கு ஒரு பெட்டிதான்
அதுவும் பதினைந்து கிலோதான் கூடுதல்
எடைக்கு கிலோவுக்கு ஐ நூறு கட்டவேண்டி இருக்கும்
அந்த வகையில் உங்களிடம் இருக்கும் எடைக்கு
கூடுதலாக இருபத்தைந்தாயிரத்துக்குக் குறையாமல்
கட்டவேண்டி இருக்கும் " என ஒரு பெரிய
அணுகுண்டாகத் தூக்கிப் போட்டுவிட்டார்

நான் ஒருகணம் ஆடிப் போனேன்

(தொடரும் )

Wednesday, March 15, 2017

எல்லாம் சில வார ஆட்டம்தான்....





பகல் உச்சிப் பொழுது எனப் பெயர்.
அதனால் எந்தப் பலனும் இல்லை 
முழுமையாக உடல்முழுவதும் போர்த்திக்கொண்டு கூட வீ ட்டுப் பால்கனியில்  நின்று  ஒரு புகைப்படம்  எடுக்க இயலவில்லை
பனிப் பொழிவு  அத்தனைக்கடுமையாக  இ ருக்கிறது 

மக்களுக்கு நியாயமான கோபம் 
திருமதி சசிகலா அவர்கள் மீது இருந்தாலும் கூடச்  சட்டமன்ற உறுப்பினர்களின் ஆதரவு அவருக்கு இருப்பதால் 
ஏதும் செய்யமுடியாதுமக்கள்  தவிப்பதை போலவே 
இந்தப் பனிப்பொழிவின் அட்டகாசத்தில்  கதிரவனும் 
அடங்கியே  கிடக்கிறான்
  
எல்லாம் சில வார ஆட்டம்தான்  என்பது 
நம்மைப் போலவே அவனுக்கும் தெரியும்தானே 

Friday, March 10, 2017

"ஒரு பாமரப் பதிவரின் " அமெரிக்கப் பயணம் "

கடந்த பத்து நாட்களாக தேவையில்லாமல்
அலைவதில்லை
(தேவைக்காக அலைவதே அதிகம்
அதைத் தவிர்க்க இயலவில்லை )

அளவோடு சாப்பிட்டுக் கொள்கிறோம்

முழு உடல் பரிசோதனைச் செய்து கொண்டு
குறைபாடு உள்ளதற்கு மருந்து மாத்திரை
எடுத்துக் கொள்கிறோம்

மிக முக்கியமான தகவல்களை
நாட்குறிப்பில் குறித்துக் கொள்கிறோம்

சென்றமுறை போல அவ்வளவு
பதட்டமும் குழப்பமும் இல்லையென்றாலும்
கூட கொஞ்சம் பயம் இருக்கத்தான் செய்கிறது

மொத்தம் 31மணி நேரப் பயணம்
மலைப்பை ஏற்படுத்துகிறது

வருகிற 13 இல் மீண்டும் மனைவியுடன்
அமெரிக்கா (நியூஜெர்ஸி ) செல்கிறோம்

சென்ற முறை பதட்டத்திலேயே
மிகச் சரியாக இரசித்துப் பார்க்க முடியாததை
இம்முறை பதட்டமின்றி பார்த்து இரசிக்க
உத்தேசித்துள்ளோம்

அவசியமெனில் "ஒரு பாமரப் பதிவரின் "
அமெரிக்கப் பயணம் என ஒரு கட்டுரைத் தொகுப்பு
எழுதலாம் என்கிற எண்ணமும் இருக்கிறது

சென்றமுறை எடுத்த புகைப்படங்களின் தொகுப்பு
அடிக்கடி ஞாபகமூட்டிப் போகிறது

அமைப்பு எப்படி இருக்கிறது எனத் தெரியவில்லை

பார்ப்போம்.....

Thursday, March 9, 2017

இளைஞர்களே நாமொரு புதிய பாதையை வகுப்போமா ?...

கொள்ளையர்கள்
கொள்ளையடித்த பணத்தோடு
இன்னும் கொள்ளையடிக்க
அதிகாரம் கேட்டு
வரும் நாள் முடிவாகிவிட்டது

என்ன செய்யப்போகிறோம் ?

சொல்லாத சொல்லுக்கு
மட்டுமல்ல
விற்பனைக்கல்லாத பொருளுக்கும்
நிச்சயம் விலையில்லை

இனியும் நம் தலையில்
நாமே மண்ணை அள்ளிப் போடாதிருப்போமா ?

ஒவ்வொர் வீட்டு வாசலிலும்
"நாங்கள் விற்பனைப் பண்டமல்ல
எங்கள் வாக்கும்
விற்பனைக்கில்லை" எனும்
வாக்கியத்தை
அச்சிட்டு வைப்போமா ?

திருமங்கலம் ஃபார்முலாவுக்கு
நேர் எதிராய்
ஆர் .கே நகர் ஃபார்முலாவை உருவாக்கி

தமிழகம் கொண்டக்
கறையினைத் துடைப்போமா ?

இளைஞர்களே

நாமொரு புதிய
பாதையை  வகுப்போமா  ?

Tuesday, March 7, 2017

மிக நிச்சயமாய் நாம் மனிதனே இல்லை....

கடலில்
சுட்டுக் கொல்லப்பட்டவன்
மீனவனா
தமிழனா
இந்தியனா

அந்தக் கொடும் செயலுக்கு எதிராக
கருத்துத் தெரிவிப்பதில் கூட
இதற்குள் அவன் எதில்
அடங்குகிறான் என அலசிக் கொண்டிருக்கிறோம் எனில்  ...

இந்தக் கொலைக்கு எதிராக
எதிர்ப்பைப் பதிவு செய்வதில்
நமக்கு என்ன லாபம் இருக்கிறது
எனக்  கணக்கிட்டுக் கொண்டிருக்கிறோம் எனில்...

சந்தேகமே இல்லை
நாம் தமிழனும் இல்லை
நாம் இந்தியனும் இல்லை

காரணம்
நாம் தமிழனாகவோ
இந்தியனாகவோ
அடையாளப்படுத்திக் கொள்ளவேண்டுமெனில்

குறைந்த பட்சத் தகுதியாக
நாம்  அவசியம்
மனிதனாக

மிக  மிக முக்கியமாய்
மனிதத் தன்மை கொண்டவனாக
இருக்கவேண்டும் இல்லையா ?


Monday, March 6, 2017

பெண்ணெனும் ஆணெனும் சொல்லிரண்டும் எதிர்ச்சொல் இல்லை இணைச்சொல்லே

இராகம் என்பது ஆணினமே
தாளம் என்பது பெண்இனமே
இராகமும் தாளமும் இணைந்திருந்தால்
வாழ்வில் என்றும் இன்னிசையே

மேகம் என்பது ஆணினமே
குளிந்தக் காற்றுப் பெண்இனமே
மேகமும் காற்றும் இதையுணர்ந்தால்-
வாழ்வில் என்றும் சுகமழையே

வலிமை என்பதுஆணினமே
மென்மை என்பது பெண்இனமே
வலிமையும் மென்மையும் ஒருங்கிணைந்தால்
வாழ்வில் என்றும் சுகலயமே

பெண்ணெனும் ஆணெனும் சொல்லிரண்டும்
எதிர்ச்சொல் இல்லை இணைச்சொல்லே
திண்ணமாய் மனமிதை ஏற்றாலே
சொர்க்கமாய் மாறும் இவ்வுலகே

Sunday, March 5, 2017

ஒட்டக் காய்ச்சிய உரை நடையே

காதல் உணர்வதுப்   பூக்கையில்
சேர்ந்தே பிறந்துப்  பரவும்
மகரந்த மணமே

வண்ண வண்ண வார்த்தைப் பூக்களைச்
சந்தச் சரடில் சேர்த்திணைக்க வளரும்
மனங்கவர் பூமாலையே

கவிஞனும் கற்பனையும்
கந்தர்வ மணம்புரிந்து
கூடிக் களிக்கப் பிறக்கும்
அதியக் குழந்தையே

மடமை மரம் முறிக்க
சிந்தனைச் சிற்பிகளுக்கு வாய்த்த
 கூர்மிகுக்  கோடாலியே

தனிமைத் துயர்ப்  போக்கி
ஏகாந்தச்  சுகத்தில் மிதக்கவிடும்
ரம்பையே ஊர்வசியே

குறிவைத்த இலக்கினை
மிகச் சரியாய்த்
தாக்கிக் தகர்க்கும் விசைமிகு  பாணமே

எண்ணச் சுமைகளை
எளிதாக ஏற்றிச் செல்ல
ஏதுவான எழில்மிகு வாகனமே

தூங்கச் செய்யவோ
ஏக்கத்தைச்  தூதாய்ச் சொல்லவோ
கவலையை மறக்கவோ
களிப்பில் மூழ்கிச் சுகிக்கவோ
வாழ்வை ரசிக்கவோ
ரசித்தததை சுருக்கமாய் விளக்கவோ

கவிதைபெண்ணே உனக்கு ஈடாய்
உலகினில் மாற்று ஏது சொல்
எமக்கு  உன் அருளை
என்றும்போல்  வாரிவழங்கிச் செல்

Saturday, March 4, 2017

தோல்வியே அறியாது தொடர்ந்து பயணிப்போம்....

உணவே
உணர்வைத் தீர்மானிக்கிறது
உணர்வு
நிலைப்பெற்றபின் அதுவே
உணவைத் தீர்மானிக்கத் துவங்குகிறது

எண்ணமே
மனதைத் தீர்மானிக்கிறது
மனம்
நிலைபெற்றதும் அதுவே
எண்ணங்களைத் தீர்மானிக்கத் துவங்குகிறது

செயலே
பழக்கத்தைத் தீர்மானிக்கிறது
பழக்கம்
நிலைக்கொண்டதும் அதுவே
செயலைத் தீர்மானிக்கத் துவங்குகிறது

இலக்கே  
வழியைத் தீர்மானிக்கிறது
வழியில்
மனம் நிலைபெற்றதும் அதுவே
இலக்கைத் தீர்மானிக்கத் துவங்குகிறது

எனவே
என்றும்
எப்போதும்

ஒரு கவளம் தானே
சிறு எண்ணம் தானே
நொடிச் செயல்தானே
சிறு விலகல்தானே என

எதிலும்
அலட்சியம் கொள்ளாதிருப்போம்
என்றும்
தோல்வியே  அறியாது
தொடர்ந்து பயணிப்போம்

விந்தையதே வியக்கும் விந்தைதான்

சிந்தனை யானைகளைக் கட்டி
பலசமயம்
இழுக்க இயலாதுப்  போனக்
கவிதைத் தேரது

ஒரு எண்ணச்  சிறு எறும்பிழுக்க
வேகமாய்
வலம் வருவது விந்தை

குடம் குடமாய்ப்
பாண்டித்திய
நீரூற்ற
வளராது வாடும்
கவிதைச் செடியது

ஒரு சிறு வார்த்தைச்  சாரலில்
முதுகு நிமிர்த்தி
ஓங்கி வளர்வது  விந்தை

இலக்கண அளவுகோலில் நிறுத்து
முயன்று செய்ய ருசிக்காதக்
கவிதைக் குழம்பு

சந்தமெனும்
கை நிறுக்க
அதிகம் ருசிப்பது விந்தை

விதம் விதமாய்
அணிகள் பூட்டியும்
வித்தைகள் செய்தும் வரமறுக்கும்
கவிதைக் குழந்தை

ஏகாந்தமாய் வேறு
 எதையோ  நினைத்திருக்கையில்
சட்டெனத் தாவியணைத்து
சிந்தை கவர்வது விந்தை

ஆம்  ....

 அதிசயமே அசந்து போகும்
அதிசயங்கள் பல  போலவே
 விந்தையதே வியக்கும்
விந்தை நிச்சயம் கவிதைதான் 

Friday, March 3, 2017

தாமிரபரணித் தண்ணீரும் நீதிபதிகளின் தீர்ப்பும்...

"இந்த வழக்குத் தொடர்ந்துள்ளவர்
குளிர்பான நிறுவனத்தில் 3ஆண்டுகளாகப்
பணியாற்றியுள்ளார்.அவர் நியாயமாக
நடந்து கொள்ளாததால் பணியில் இருந்து
விடுவிக்கப் பட்டுள்ளார்
இதனால் குளிர்பான நிறுவனத்திற்கு
எதிராகச் செயல்படுகிறார்

குளிர்பான நிறுவனத்திற்கும்
தனக்குமான தனிப்பட்டப் பிரச்சனையை
தீர்க்க பொது நலன் மனுத்தாக்கல் செய்துள்ளார்

தனிப்பட்ட நலன்களுக்காக
பொது நலவழக்குத் தொடர்வதை
ஏற்க முடியாது

எனவே இரண்டு மனுக்களும் தள்ளுபடி
செய்யப்படுகின்றன "
என நீதிபதிகள் உத்திரவில் கூறியுள்ளனர்

பொது நல வழக்கு என்பது வழக்கைப் பதிவு
செய்வோர் குறித்துத்தான்
விஷயம் குறித்து இல்லை என்பதுவும்

தாமிரபரணித் தண்ணீர் குறித்த
வழக்கு என்பது பொது நலன் குறித்த
வழக்கு இல்லை என்பதைப் படிக்கப் படிக்க
நீதியின் மீதும் நீதிமன்றத்தின் மீதும்
எனக்கு அளவிட முடியாத மதிப்பும்
மரியாதையும் பீறிட்டு எழுவதை ஏனோ
என்னால் தடுக்க முடியவில்லை

உங்களுக்கும் அப்படித்தானே 

Wednesday, March 1, 2017

"தெய்வத்தின் குரல் "

கடவுளின் உருவினை சக மனிதனின் உருவிலும்
அவன் குரலினை சகமனிதனின் குரலிலும்
கண்டுகொள்ளத்தெரிந்தவர்கள் எல்லாம் நிச்சயம்
பாக்கியசாலிகளே

அதற்குபெரும் ஞானம், தவம், வரம் எல்லாம்
நிச்சயம் வேண்டியதில்லை

மாறாக சக மனிதர்களிடம் அன்பும் நேசமும்
கொண்டால் போதும் என்பதுவே என்
அசைக்கமுடியாத அபிப்பிராயம்

இருபது வருடங்களுக்கு முன்னால் நான்
அரசுப்பணியில் இருந்த ஒரு மாலைப் பொழுது..

நான் எப்போதும் அலுவலகப் பணியில்
ஈடுபாடுகொண்டு பணியாற்றுவதைப் போலவே
சக ஊழியர்களிடம் மிகக் குறிப்பாக எனக்குக்
கட்டுப்பட்ட ஊழியர்களிடமும் மிக
ஈடுபாட்டுடன் நெருக்கமாகப் பழகுவேன்.
அவர்கள் அனைவரும் அவரது
சுக துக்கங்களை உடன் பிறந்தவனைப் போலவே
உரிமையுடன், ஒளிவு மறைவின்றி என்னுடன்
எப்போதும் பகிர்ந்து கொள்வார்கள்.
என்னைப் போலவே

அதை போலவே அன்றைய மாலை பொழுதில்
என் உதவியாளர் அவர் மகனுக்குப் பெண்
பார்த்து வந்த விஷயம் குறித்து என்னிடம்
பகிர்ந்து கொண்டார். அவர் இதுவரை பத்துக்கு
மேற்பட்ட இடங்களில் பெண் பார்த்து வந்தும்
எதுவும் சரியாக அமையவில்லை

காரணம் கேட்டால் ஏதாவது ஒரு குறை சொல்வார்
கடைசியாக முதல் நாள் மீண்டும் பெண்பார்க்கப்
போவதாக விடுமுறை கேட்டுப் போயிருந்தார்

அது என்ன ஆயிற்று என்று நானும் அவரும்
தனித்து இருக்கையில் கேட்க இப்படிச் சொன்னார்

"பெண் நன்றாக இருக்கிறாள். எல்லோருக்கும்
பிடித்திருக்கிறது.செய்முறையும் எதிர்பார்த்தப்படி
எல்லாம் செய்வதாகச் சொல்கிறார்கள்
ஆனால்..."

"ஆனால் என்ன ஆனால் எல்லாம் பிடித்திருந்தால்
முடித்து விடவேண்டியதுதானே
அது என்ன திரும்பவும் ஆனால் ..."என்றேன்

"அது வந்து எல்லாம் சரியாக இருக்கிறது
ஆனால் வாடகை வீட்டில் இருக்கிறார்கள்
சொந்த வீடு இல்லாத இடத்தில் எப்படிப்
பெண் எடுப்பது...எனத்தான் யோசிக்கிறோம்"
என்றார்

எனக்கு தூக்கி வாரிப் போட்டது. பெண்
பார்ப்பவர்கள் இதையெல்லாம் பார்ப்பார்களா
என அதிர்ச்சியாகவும் இருந்தது

காரணம் நான் அப்போது வாடகை வீட்டில்
குடி இருந்தேன்.வீடு கட்டும் அளவு
வசதியும் வாய்ப்பும் இருந்தபோதும்
வீடுகட்டத் தோதாக இரண்டு மூன்று இடங்கள்
வாங்கிப் போட்டிருந்தாலும், குழந்தைகள்
பள்ளிப் படிப்புக்குத் தோதாக பள்ளி அருகில்
வீடு பிடித்து இருந்தேன்.

எனக்கு இரண்டு பெண் குழந்தைகள்
நாளை நல்ல சம்பந்தம் வாய்த்து அவர்களும்
இதைப் போல யோசிப்பவர்களாக இருந்தால்
என்ன செய்வது என்கின்ற பயம் மெல்ல
மெல்ல விஸவரூபம் எடுக்கத் துவங்கியது

மீண்டும் அதிர்ச்சியுடன்  "திரும்பச் சொல்
என்ன சொல்கிறாய்.." என்றேன்

அவரும் அசராது "சொந்த வீடு இல்லாத
இடத்தில் எப்படிப் பெண் எடுப்பது.." என்றார்

அந்த வார்த்தை ஏனோ என்னை இரண்டு நாளாக
தூங்கவிடாது இம்ஸித்துக் கொண்டே இருந்தது

அப்போதே தீர்மானம் செய்து விட்டேன்
அதுவரை நாம் நினைத்தால் எப்போது
வேண்டுமானலும் கட்டிக் கொள்ளலாமே என
என்னுள் இருந்த ஒரு அலட்சியத்தை
சட்டென ஒதுக்கி வைத்து உடன் வீடு கட்டுவது
குறித்து அதிகம் யோசிக்கத் துவங்கினேன்

உடன் ஆறு மாதத்தில் புது வீடு கட்டிமுடித்து
கிரஹப் பிரவேசமும் முடித்துவிட்டேன்

இப்போது நினைத்தால் கூட அவருடைய குரலும்
அதனால் எனக்குள் ஏற்பட்ட ஒரு உத்வேகமும்
சட சட வென எல்லா வேலைகளும்
தங்குத் தடையின்றி நடந்ததும்
பிரமிப்பூட்டும்படியாகத்தான் இருக்கிறது

இப்போதும் கூட ஒரு பாஸிட்டான விஷயத்தை
என்னுடன் பேசுபவர்கள் சொன்னால்
என்பது மட்டுமல்லாது, என்னக் கடந்துச் செல்வோர்
சொல்லிக் கொண்டு போனால் கூட,
பதிவுகளில் படித்தால் கூட
அதை மிகக் கவனாமாகக் கேட்டு அது
இறைவன் மனிதன் மூலமாக எனக்குச்
சொல்லும்செய்தியாகவே எடுத்துக் கொள்கிறேன்
அது எனக்குப் பலவகைகளில் வழிகாட்டியாக
உதவுவதாக உள்ளது

ஆம் கடவுளை மனித உருவிலும் அவனது
குறிப்புகளை மனிதனின் சொற்களிலும்
புரிந்து கொள்வதற்கு தவமோ,வரமோ, ஞானமோ
நிச்சயம் தேவையில்லை

மாறாக சக மனிதர்களிடம் அன்பும் நேசமும்
கொண்டால் போதும் என்பதுவே என்
அசைக்கமுடியாத அபிப்பிராயம்

உங்களுக்கு ..............



Sunday, February 26, 2017

இவையெல்லாம் தமிழகத்தில் மட்டுமே சாத்தியம்...

முன்னாள் முதல்வர் செல்வி ஜெயலலிதா
அவர்களை நீதிமன்றம் குற்றவாளி எனத்
தீர்மானித்து அதற்கான உத்தரவினைப்
பிறப்பித்த பின்னும்...

செல்வி ஜெயலலிதா அவர்களை குற்றவாளி
எனக் கூறுதல் கண்டனத்துக்குரியது
என டிடிவி தினகரன் அவர்கள் கூறுவதும்...

"ஹைட்ரோ கார்பன் திட்டம் மக்களுக்கு நன்மை
பயக்கும் திட்டம். ஒரு நாடு நன்றாக
இருக்கவேண்டுமென்றால்
ஒரு மாநிலத்தைத் தியாகம் செய்யலாம் "
என நம் மாநிலத்தைச் சேர்ந்த
இல. கணேசன் அவர்கள்
நம்  மாநிலத்தில் இருந்தே சொல்வதும்...

பகுத்தறிவுப் பிரச்சாரத்தையே
அடிப்படையாகக் கொண்ட தி. மு. க கட்சியின்
செயல் தலைவர் தன் அறுபதாம் ஆண்டுக்குரிய
வைபவத்தை கோவிலில் வைதீக முறைப்படி
செய்து முடித்து வெளிவர அதுகுறித்து
நிருபர்கள் கேள்வி எழுப்ப அது என் தனிப்பட்ட
விஷயம் எனக் கூறுவதும்...

அரசியல் அரிச்சுவடி கூட அறியாத
எந்த அரசியல் இயக்கங்களிலும்
பங்குபெறாத திருமதி , தீபா அவர்கள்
 உறவு என்பதாலேயே
ஒரு இயக்கத்தைத் துவக்குகிற தைரியமும்
மிகத் துணிச்சலாக முன்னோடி
இயக்கத் தலைவர்களுடன் தன் பெயரையும்
இணைத்து கட்சிப் பெயரிடுவதும்

நிச்சயம் இது தமிழ் நாட்டில் மட்டுமே
சாத்தியம் என நினைக்கிறேன்...

பழம் பெருமைகளிலும்,
நிகழ் காலச் சிறுமைகளிலும்
சிறந்து விளங்குவது எது என ஒரு போட்டி
வைக்கப்படுமானால் நிச்சயம்
இரண்டிலும்நம் தமிழகமே
முதல் பரிசு தொடர்ந்து பெறும்
என்பதில் எள்ளளவும் சந்தேகமில்லை எனக்கு

உங்களுக்கு ?

Friday, February 24, 2017

சுனாமியாய்ச் சீற இருக்கிற எதிர்ப்புக்கு ...

ஒளிந்து நெளிந்து ஓடும்
சிற்றோடை
எதை சாதித்து விடப் போகிறது
என நகர வாசி நினைக்க

நாளை வரவிருக்கும்
காட்டாற்றுக்குச் சிற்றோடை
வழியமைத்துப் போகிறது
எனப்புரிந்து கொள்கிறான மலைவாசி

அனாதையாய்,ஒடுங்கிப் போகும்
ஒற்றயடிப் பாதையால்
பயன் என்ன இருந்துவிடப் போகிறது
எனப் பாமரன் நினைக்க

நாளை வர இருக்கும்
நாற்கரச் சாலைக்கு ஒற்றையடிப் பாதையே
மையக் கோடாய் இருக்குமெனப்
புரிந்து கொள்கிறான் பொறியாளன்

ஒளிந்து மறைந்து எதிர்ப்பை
முனகலாய் வெளிப்படுத்துவோரால்
என்ன செய்து விட முடியும்
எனக் கொக்கரிக்கிறான் அதிகாரமுள்ளவன்

தேர்தல் காலங்களில்
சுனாமியாய்ச்  சீற   இருக்கிற எதிர்ப்புக்கு
இந்த முனகலே ஆரம்ப அறிகுறி எனப்
புரிந்து கொள்கிறான் அரசியல் அறிந்தவன்

Thursday, February 23, 2017

இரண்டுக்கும் இடையில் உள்ளது.....

"இரண்டுக்கும் இடையில் உள்ளது
சரியாய் இருந்தால்
எல்லாம் சரியாய் இருக்கும்

இரண்டுக்கும் இடையில் உள்ளது
தவறாய் இருந்தால்
எல்லாம் தவறாய் இருக்கும் "
என்றான் என் நண்பன்

"எது இரண்டு
எது நடு
விளங்கவில்லை " என்றேன்

"நீயே யோசித்துச் சொல்
நான் அதுவா எனச் சொல்கிறேன்"
என்றான்

"துணைப் பொதுச் செயலாளருக்கும்
மக்களுக்கும் இடையில் இருக்கும்
சட்டமன்ற உறுப்பினர்களா ? "என்றேன்

"அசிங்கத்தை விடு
வேறு சொல் " என்றான்

"நோயாளிக்கும் மருத்துவனுக்கும்
இடையில் இருக்கும்
கார்ப்பரேட் மருத்துவ முதலாளிகளா ? "

வாசகனுக்கும் படிப்பாளிக்கும்
இடையில் இருக்கும்
ஆசை கொண்ட பிரசுரகர்த்தாக்களா ?

மாணவனுக்கும் பேராசியருக்கும்
இடையில் இருக்கும்
படிப்பறியா கல்வித் தந்தைகளா ?

பக்தனுக்கும் கடவுளுக்கும்
இடையில் நிற்கும்
கபடப் போலிப் பூசாரிகளா ?

விவசாயிக்கும் நுகர்வோனுக்கும்
இடையிலிருக்கும்
பேராசை வியாபாரப் புள்ளிகளா ?

வாங்குபவனுக்கு விற்பவனுக்கும்
இடையில் இருக்கும்
பேராசைத் தரகர்களா ?

நன்கொடை தருபவனுக்கும் பெறுபவனுக்கும்
இடையில் இருக்கும்
போலிச் சமூக இயக்கங்களா ?

நான் சொல்லிக் கொண்டே போக
சிரித்துக் கொண்டே கேட்டுக் கொண்டிருந்தவன்
முடிவாக ..

"உலகைச் சுற்ற
முருகனைப் போல் ஏன்
மயிலில் ஏறுகிறாய்

அம்மைஅப்பனைச் சுற்றினால்
அது போதாதா ?" என்கிறான்

"இன்னும் குழப்புகிறாய்"
என்கிறேன் எரிச்சலுடன்

பின் அவனே

" உடலுக்கும் உயிருக்கும்
இடையிலிருக்கும்
பேராசை நோய்ப்பிடித்த
நம் அனைவரின் மனது "
என்றான்

Tuesday, February 21, 2017

வீரப்பன் சமாதியும்....

சில வருடங்களுக்கு முன்பு
சந்தனக்  கடத்தல் வீரப்பன்
சமாதி இருந்த ஊரின்
வழியாக வரும் சந்தர்ப்பம் நேர்ந்தது

அன்று சமாதியில் அதிகக் கூட்டமும்
மலர் மாலைகளும் நிறைந்திருந்தன

என்ன காரணம் எனக் கேட்டேன்

அது அவரது நினைவு நாளெனவும்
அந்த நாளில் அவரது குடும்பத்தவரும்
அவரால் பயனடந்த கிராமத்தவர்களும்
வந்து அஞ்சலி செலுத்திப் போவார்கள்
என்றார்கள்

"மந்திரிகள், மக்கள் பிரதிநிதிகள்,
உயர் அதிகாரிகள் யாரும் வந்து போவார்களா ?"
என்றேன்

அந்தக் கிராமத்தான் என்னை மிக
இகழ்ச்சியாகப் பார்த்தபடிச் சொன்னான்

"ஏன் சார் சட்டப்படி குற்றவாளி யென
தீர்மானிக்கப்பட்ட ஒருவரை அதிகாரிகளோ
மந்திரிகளோ வந்து அஞ்சலி செலுத்திப் போனால்
அவர்கள் சட்டத்தை மதிக்காதவர்கள்
என ஆகிப் போகாதா ?

சட்டத்தை மதிப்பேன்,அதன்படி நடப்பேன்
என உறுதி ஏற்றுப் பதவி ஏற்றவர்கள்
அதை மீறியவர்கள் என ஆகிப் போகாதா ?

அவர்கள் இவ்விடம் வந்து உன் வழியில்
நடப்பேன் என உறுதி ஏற்றால்
கேலிக் கூத்தாகிப் போகாதா ?
பதவி  பறிபோகாதா " என்றான்

அப்போது அவன் கூற்று அவ்வளவு
முக்கியமானதாகப் படவில்லை

இப்போது ஏனோ அதிக நேரம்
அது குறித்து யோசிக்க வைக்கிறது 

" மெயில் விடுத் தூது "

சிறுத்து
இனித்த இரவுகள்
நீண்டுக் கசக்கிறது

போர்வையாய்
கதகதத்த இருள்
மிரட்டிக் கனக்கிறது

தோழனாய்
அரவணைத்தத் தனிமை
நெருப்பாய் எரிக்கிறது

தாயாய்த்
தாலாட்டிய உறக்கம்
விழிகளைக் கிழிக்கிறது

மெழுகாய்
உருகி ஒளிர்ந்து
இருள் ஓட்டிய அற்புதமே

உடலுள்
உயிராய் நிறைந்து
உணர்வூட்டிய அதிசயமே

பிளவுகளாய்த்
தொடக்கத்தில்  தெரிந்த
சின்னச் சின்னப் பிரிவுகள்

இப்போது
பூகம்பமாய் வெடித்து
சிதறவைத்துப் போகிறது

என் சிந்தனையை
சிதிலமடையச்
செய்து போகிறது

பாமரனை
பாவலனாக உயர்த்தி
இரசித்தப் பைங்கிளியே

மீண்டும் நான்
பாமரனாவதற்குள்
உடன் வந்துச் சேர்

(  ஒரு காதலர்  பிரிவுக் கவிதையைப்
படிக்க  வந்த கோபத்தில்/ சோகத்தில்
பிறந்த கவிதை )

Sunday, February 19, 2017

122 இன் மனச்சாட்சி யும் மக்களின் எதிர்ச்சாட்சியும்

122 இன் மனச்சாட்சி : 

"நீங்கள் ஒருவகையில்
மாஃபியா கும்பலின்
அட்டகாசங்களை அழிக்க
முயன்றால்

நாங்கள் ஒருவகையில்
அதன் அட்டூழியங்களை
அழிக்க முயல்கிறோம்

குடிபோதையில் கையில்
ஆயுதங்களை வைத்து
மிரட்டுபவனை
அடக்க நினைத்தால்..

முதலில் எப்படியும்
அவன் கையில் உள்ள
ஆயுதத்தைக் கைப்பற்ற
முயற்சிக்கவேண்டும்

இல்லையேல்
அப்பாவி ஜனங்களுக்கு
நிச்சயம் ஆபத்துத்தான்

அந்த மாஃபியா கும்பலிடம்
உள்ள வலிய ஆயுதமே
பணபலமே

அதைக் குறைக்கவே
நாங்கள் உல்லாச உலகத்தில்
சில நாள் உலவினோம்

பேரத்திற்கு சம்மதித்தோம்

அரசு பறிக்க இருக்கிற
130 உடன்
எங்கள் வகையிலும்

 நிச்சயம் போகுமானால்

நிச்சயம் கொட்டம்
அடங்கத்தானே செய்யும்

அவர்கள் கொட்டத்தை அடக்க
உங்கள் வழி
தேர்தல் என்றால்
எங்கள் வழி
தேர்தலைச் சந்திக்கத்
திராணியற்றுப் போகவைப்பதே
எங்களைப் புரிந்து கொள்ளுங்கள்

நாங்களும் பாதிக்கப்படாது
உங்களுக்கென
செலவழித்த காசைத் தேற்ற
இது ஒன்றே சுருக்கு வழி  

நம் இருவருக்கும்
வழிதான் வேறு வேறு
இலக்கு ஒன்றுதான்

இலக்கில் கூடிய விரைவில்
சந்திப்போம்

வாழ்த்துக்களுடன்  ...."

மக்களின் எதிர்ச்சாட்சி :

"சோரம் போனவர்கள் எல்லாம்
அதற்கு ஒரு
மிகச் சரியான காரணம் வைத்திருப்பார்கள்
உங்களதும் அந்த வகையே

மகா எரிச்சலுடன்... 

Saturday, February 18, 2017

முதல் குற்றவாளி சமாதி ஆகிப்போக .....

முதல் குற்றவாளி
சமாதி  ஆகிப்போக

இரண்டாம் குற்றவாளி
மற்றும்
மூன்றாம் நான்காம்
குற்றவாளிகள்
சிறைக்கைதிகளாக

அவர்களையே

ஆசிர்வதிப்பவர்களாக
வழிகாட்டிகளாக
காட்டிக் கொள்பவர்கள்
எவ்வித குற்ற உணர்வுமற்று
ஆள்பவர்களாக

அவர்களை
கண்மூடித்தனாமாய்
ஆதரிப்பதே கடமையெனக்
கொண்டவர்களே
மக்கள் பிரதிநிதிகளாக

தன் முட்டையை
விழுங்கும்
நாகம் கண்டும்
கையறு நிலையில்
கதறித் திரியும்
காகங்களாய்
பொது ஜனங்களாக

மல மேட்டிலமர்ந்து
அறுசுவை உணவருந்தும்
நிலை வந்தததுபோல்
இங்கு வாழநேர்ந்ததுக் குறித்து
மனம் வெறுத்துப்  போக

சாக்கடையை
அரசியலுடன் ஒப்பிடுவது கூட
சாக்கடையை இழிவுபடுத்தும் ஒப்பீடு
என்பது நிதர்சனமாகிப் போக

தர்மம் தன்னை
சூது கவ்வும்
பின் மெல்ல மெல்ல
கடித்து விழுங்கும் என்னும்
புது மொழி  இங்கு நிஜமாகிப் போக..

தமிழகம் மட்டுமே
இப்போது
தலைகவிழ்ந்த நிலையில்.....

என்ன செய்யப் போகிறோம் ?

"மக்கள் தீர்ப்புக்கு எதிராக அரசாளவோ ? "....

கூவத்தூர் ரிசார்ட்டை
சீரமைப்பதற்காக
மூன்று நாள்தான் மூடி இருக்கிறார்கள்

தவறுக்கு பிராயச்சித்தமாக
ஹோமங்கள் செய்து
மீண்டும் கூட
அதைத் திறக்கச் சாத்தியம் உண்டு

மக்கள்
தங்கள் மனக்கதவை
உங்களுக்கு எதிராக
நிரந்தரமாக மூடிவைத்துவிட்டார்களே

என்ன செய்யப் போகிறீர்கள் ?

"மக்கள் தீர்ப்புக்கு
எதிராக அரசாளவோ ? "
என்கிற புரட்சித்தலைவரின்
பாடல் அடிக்கடி
நினைவில் வந்து
எங்களுக்கு நம்பிக்கை தந்து போகிறது

அதே பாடல்
உங்கள் அடிவயிற்றைக்
கலக்கிப் போகும் என்பதில் எங்களுக்குத்
துளியும் சந்தேகமில்லை

பார்ப்போம்....

Friday, February 17, 2017

இனியேனும் வாக்களிக்கையில் விழித்திருக்க முயலுங்கள்...

இதற்கு மேல்
நிச்சயம் எங்களுக்கு
உயர்வில்லை
உயர்வதற்கான தகுதியும்
எங்களுக்கில்லை

இதை நழுவ விட்டால்
மீண்டும் இதுகிடைக்க
நிச்சயம் வாய்ப்புமில்லை

செலவழித்ததை இனி
இருந்து சம்பாதிப்பதும்
அதற்குத் தோதாய்
பதவி பறிபோகாது
காத்துக் கொள்வதற்கும்

கூடுதலாய்க் கிடைக்கிற
பரிசுகளை
உல்லாசங்களை
விடாது அனுபவிப்பதற்கு
என்ன செய்ய வேண்டும் என்பதே
எங்களின் இன்றைய நிலைப்பாடு

எங்களிடத்தில் துளியும்
குழப்பமில்லை

உங்களைச் சந்தித்து
கெஞ்சிக் கூத்தாடி
மீண்டும் வெற்றி கொள்ளும்
எண்ணம் ஏதும் எங்களுக்கில்லை

அதற்கான வாய்ப்பும் இல்லை என்பது
எங்களுக்கு மிகத் தெளிவாய்த் தெரியும்

காரணம்
கொள்கைக் கோட்பாடு
கச்சடாக்கள் எல்லாம்
எங்களிடத்து அறவே இல்லை

எங்களைப் பொருத்தவரை
அது தேவையுமில்லை

துண்டுக்காக
வேட்டியை இழப்பது
அப்படியொன்றும்
கேவலமான விஷயமாக
எங்களுக்குத் தோன்றியதே இல்லை

நாங்கள் உங்களை மிகச் சரியாப்
புரிந்து கொண்டுள்ளோம்

நீங்கள்தான் எங்களை மிகச் சரியாய்ப்
புரிந்து கொள்ளாது அவதிப்படுகிறீர்கள்

நாங்கள் சுதந்திரமாய்
இல்லையென்றாலு கூட
உல்லாசமாகச் சந்தோஷமாகத்தான் உள்ளோம்

நீங்கள் சுதந்திரமாய்
இருந்தாலும் கூட
வேதனையில்தான் வெந்து கொண்டிருக்கிறீர்கள்

இதற்குமேல் எப்படி
மனம் திறப்பது ?

இப்போது நொந்து விழித்திருந்துப் பயனில்லை

இனியேனும்
வாக்களிக்கையில் விழித்திருக்க முயலுங்கள்

Thursday, February 16, 2017

தமிழினத்தின் நிஜமான திருநாள்

சிலரோட ஆசைக்கு
பலபேரின் தேவைகளைப்
பலிவாங்கும் நாடாகிப் போச்சே--நாடே
பலிபீடம் போலாகிப் போச்சே

சிலகோடிக் காசுக்கு
பலகோடி பொதுஜனத்தின்
நிலைமறந்தோர் வசமாகிப் போச்சே-அரசியல்
கூவத்தினும் மோசமாகிப் போச்சே

சபதமதும் தியானமதும்
நல்லோர்க்கு என்றிருந்த
வழக்கொழிந்து நாசமாகிப் போச்சே-தீயோர்
கைத்தடியாய் அதுவுமாகிப் போச்சே

பணபலமும் அராஜகமும்
இரதமேறிப் பவனிவர
இனமானம் குப்பையென ஆச்சே-எல்லாம்
பழங்கதையாய் வெறும்கனவாய்ப் போச்சே

ஆடுவோர்கள் ஆட்டமெல்லாம்
அடங்கிவிடும் நிச்சயமாய்
மாறுபாடு இல்லையிதில் தம்பி--நீ
மனதிலிதை பதித்திடுவாய் நம்பி

புலம்பலதை  மனக்கசப்பை
புயலாக நெருப்பாக
சிதறாது  மாற்றிடுவோம்  ஒருநாள்---அதுதான்
தமிழினத்தின் நிஜமான திருநாள்

மீட்பின்றி சபிக்கப்பட்ட" பொது ஜனங்களாய் "


ஊழல் பெருச்சாளிகளுக்கும்
உதவாக்கரை தலைவர்களுக்கு மிடையில்
ஈட்டி ஏந்திய கோழைகளாய்
வெறும் வாக்காளிக்கும் எந்திரங்களாய்

புரட்டு மதவாதிகளுக்கும்
முரட்டு பகுத்தறிவாளருக்கு மிடையில்
சுழலில் மாட்டிய படகுகளாய்
இரு தலைக் கொல்லி எறும்புகளாய்....

திமிங்கல  நிறுவனங்களுக்கும்
உள்நாட்டு  முதலைகளுக்கு மிடையில்
தீயில் உருகும் மெழுகாய்
ஏழ்மையில் கரையும் உயிரினங்களாய்.

சிகரத்தைப் பார்த்து ஏங்கியபடி
பாதாளம் பார்த்துப் பயந்தபடி
சரிவினில் தொங்கிடும் ஜந்துக்களாய்
பரிதவித்தே சாகும்  விலங்கினங்களாய்..

பல்லாண்டு அலைந்து திரிகிறோம்
நல்லதொரு மேய்ப்பனைத் தேடி
தீராத பாவப்பட்ட ஜென்மங்களாய்
மீட்பின்றி சபிக்கப்பட்ட" பொது ஜனங்களாய்  "

Wednesday, February 15, 2017

இன்றைய அரசியல் சூழல்.. ஒரு யதார்த்தப் பார்வை

அ.இ.அ.தி.மு. க வைச் சேர்ந்த பெரும்பாலான
சட்டமன்ற உறுப்பினர்கள் தொடர்ந்து
மன்னார்குடி குடும்ப அதிக்கம் உள்ள பக்கம்
நீடிப்பது அவர்கள் அறியாமல் செய்கிற
தவறு இல்லை

அது அவர்கள் அறிந்தே செய்வதுதான்

அவர்களைப் பொருத்த வரையில் அவர்கள்
அதிக பட்சம் அறிந்தது சசிகலா அம்மா அவர்களைத்தான்.
அவர்கள் தேர்தலில் சீட்டுபெற்றதும், தொடர்ந்து
தொடர்பில் இருந்ததும் சசிகலா அம்மாவுடன் தான்

ஏனெனில் அவர்களுக்கான எந்தத் தகவலும்
உத்தரவும் சசிகலா அவர்கள் மூலம்தான்
பெரிய அம்மா சொன்னதாகப் பெறப்பட்டிருக்க
வாய்ப்பு இருந்திருக்கிறதே அன்றி
இவர்கள் நேரடியாக கருத்தைச் சொல்லவோ
அல்லது கருத்தைப் பெறவோ வாய்ப்பு
நிச்சயம் இருந்திருக்க வாய்ப்பே இல்லை

அவர்களுகெல்லாம் நிச்சயம் தெரியும்
இனி இரட்டை இலை சின்னத்தில் நிற்கும்
வாய்ப்பு கிடைத்தாலும்  தேர்தலில்
வெல்லும் வாய்ப்பு நிச்சயம் இல்லை

இருக்கிற பதவியைத் தக்க வைத்துக் கொண்டு
திரிசங்குச் சொர்க்கம்போல
மீதம் இருக்கிற காலத்தை ஓட்டுவதைத் தவிர
அவர்களுக்கு வேறு வழி இல்லை

நம்மைப் பொ ருத்தவரை ...

கட்சித் தலைமை மட்டுமல்லாது வேட்பாளரின்
தகுதி அறிந்தும் வாக்களிக்க வேண்டிய
அவசியத்தை நிச்சயமாக இந்தச் சூழல்
மக்களுக்குத் தெளிவாகப் புரிய வைத்திருக்கிறது

கொள்ளை யடிக்கப்பட்ட பணம் இனி
இயல்பாய் வெளி வர வாய்ப்பு இல்லாததால்
தேர்தல் வருமாயின் கூடுமானவரையில்
இப்போதை விட கொஞ்சம் மேம்பட்ட
சட்டமன்ற உறுப்பினர்கள் வென்று வரவும்
வாய்ப்பும் இருக்கிறது

கண்ணுக்குத் தெரிந்த பெரிய விஷ மரத்தை
நீதி வீழ்த்திவிட்டது

கட்சிக்குள் பரவி உள்ள அதன் ஆணி வேர்கள்
விஷ மரத்தை மீண்டும் துளிர்க்க விடாதுச்
செய்ய வேண்டிய பொறுப்பு...

உண்மையான அண்ணா தி.மு.க தொண்டர்களுக்கு
மட்டுமல்ல

எதிர்கட்சிக்கும் இருக்கிறது

என்ன செய்யப்போகிறார்கள்

பொருத்திருந்து பார்ப்போம்

Tuesday, February 14, 2017

ஊழல் பிறவிகளின் "கைத்தடிகளை " அரியணையில் வைத்து...

தெய்வப் பிறவிகளின்
"பாதுகைகளை "
அரியணையில் வைத்து
ஆட்சிபுரிந்த வரலாறுகள்
நம்மிடையே உண்டு

ஊழல் பிறவிகளின்
"கைத்தடிகளை "
அரியணையில் வைத்து
ஆட்சிப்புரிந்த வரலாறுகள்
நம்மிடை இருந்ததில்லை

விஷம்
நெருப்பு
பகை
இவைமட்டுமல்ல

ஊழலின் எச்சங்களையும்
மிச்சம் வைத்தால்
தொடரவைத்தால்
நிச்சயம் மீண்டும்
தன் குணம் காட்டவே செய்யும்

கட்சியைக் கூட
சகித்துத் தொலைக்கலாம்
குடும்ப ஆக்கிரமிப்பை  ?
.......................................

இனியேனும்
 மக்கள் பிரதி நிதிகள்
மக்களின் எண்ணங்களை
பிரதிபலித்தலே
நாட்டுக்கு மட்டுமல்ல
அவர்களுக்கும் நல்லது

பார்ப்போம் ...

Monday, February 13, 2017

தர்மம் தன்னை சூது கவ்வும்.....

தர்மம் தன்னை
சூது கவ்வும்
ஆயினும்
இறுதியில் தர்மமே வெல்லும்

என்பதனை

தர்மம் தன்னை
சூது கவ்வும்
இருபது ஆண்டுகள் ஆயினும்
இறுதியில்
தர்மமே வெல்லும்

என இனிச் சொல்லலாம்

நீதியின் மீதும்
சட்டத்தின் மீதும்
நாம் இழந்து கொண்டிருந்த நம்பிக்கையை
மீட்டுக் கொடுத்த
நீதிபதிகளுக்கு
எங்கள் மனமார்ந்த நன்றியும்
நல்வாழ்த்துக்களும்

காதல் என்றால் இதுதானா ?

அவர்கள் காதலிக்கத் துவங்கியதிலிருந்து

அவனைப்பற்றி அவன் நினைப்பதை
அடியோடு மறந்துத்  தொலைந்தான்
எப்போதும் அவள்  குறித்த
 நினைவிலேயே  அலைந்து திரிந்தான்

அவளும் அவளைப்பற்றி
நினைப்பதை  அடியோடு விடுத்து
அவனைக் குறித்த சிந்தனையிலேயே
 நாளையும் பொழுதையும்  கழித்தாள்


அவளுடைய தேவைகள் குறித்தே
அவன் அதிக கவனம் கொண்டான்
அவனது  தேவைகளை மறந்தே போனான்

அவளும் அதுபோன்றே
அவனது தேவைகளையே
 நாளெல்லாம் நினைத்துக் கொண்டிருந்தாள்

அவர்கள் காதலிக்கத் துவங்கிய நிமிடத்திலிருந்து

அவன் அவனுக்காக வாழுதலை
அடியோடு விட்டொழித்து
அவளுக்காகவே வாழத் துவங்கினான்

அவளும் தனக்காக வாழுதலை விடுத்து
அவனுக்காகவே வாழத் துவங்கினாள்

அவர்கள் காத்லிக்கத் துவங்கிய வினாடியிலிருந்து

அவன் அவளைக் காணும் போதெல்லாம்
இமையாது ஏதோ அதிசயத்தை பார்ப்பதுபோல்
பார்த்துக் கொண்டே இருந்தான்

அவளும் அவனைக் காணும் போதெல்லாம்
ஏதோ அபூர்வப் பொருளைப் பார்ப்பதுபோல்
பார்த்துக் கொண்டே இருந்தாள்

இந்த அதிசய மாறுதலுக்கு காரணம் புரியாது
நான் குழம்பிக்கிடந்த  வேளையில்
காதலித்துக் கொண்டிருந்த நண்பன்
 இப்படிச் சொன்னான்

"பிறந்தது முதல் ஓரிடத்திலே இருந்த உயிர்கள்
இடம் மாறியதால் உண்டாகிற பிரச்சனை இது

 தானிருந்த உடலை அதிசயித்து
அசையாது பார்த்துக் கொள்ளுவதும்
மீண்டும் அதற்குள் குடியேற முயன்று
காலமெல்லாம் தோற்கிற துயரமும்
 அது காதலர்களுக்கு மட்டுமே புரியும்
தேவ ரகஸியம்

அவரவர் உயிர்களை
அவர்களிடமே வைத்திருப்போருக்கு
நிச்சயம  இது புரியச சாத்தியமில்லை "என்றான்

நான் புரிந்து கொள்ள முயன்று கொண்டிருக்கிறேன்

( அனைவருக்கும் இனிய காதலர் தின
நாள் வாழ்த்துக்கள்
.குறிப்பாக
காதலைப் புரிந்து காதலிப்பவர்களுக்கு )


Sunday, February 12, 2017

மவுத் டாக்கும் சசி மேடமும்

சினிமா சம்பந்தப்பட்டவர்களுக்கெல்லாம் தெரியும்
முன்பெல்லாம் ஒரு புதிய படம் ரிலீஸ் ஆனவுடன்
அதன் வெற்றித் தோல்விக் குறித்து அறிய...

எம்ஆர்.டி.கே எனச் சினிமா  டிஸ்ரிபூஷன் துறையில்
சுருக்கமாக அழைக்கப்படும் மதுரை ராமனாதபுரம்
திருநெல்வேலி, மதுரை ரிஸல்டை அதிகம்
எதிர்பார்ப்பார்கள். ஏனெனில் இங்கு ஏ,சென்டர்
பி.சென்டர் மற்றும் சி சென்டரின் கலவை
மிகச் சரியாக இருக்கும்.இங்கு மதிப்பிடப்படும்
மதிப்பீடு கூடுமானவரையில்
மிகச் சரியாகவே இருக்கும்

ஏனெனில் இங்குள்ளவர்கள் எதையும்
நாகரீகம் என்னும் போர்வையில்
மௌனமாக இரசிக்காது சப்தம் போட்டே
இரசிப்பார்கள்.அதற்காகவே தமிழ்பட முன்னணி
இயக்குநர்களும்,குறைந்த கட்டணத்தில் உள்ள
இருக்கையில் அடையாளம் தெரியாமல் அமர்ந்து
பார்க்க வந்த செய்தியெல்லாம் முன்பு
அடிக்கடி பத்திரிக்கையில் வரும்

படம் மட்டும் அல்ல.அரசியல் நிகழ்வுகள் கூட
இங்கு கணிக்கப்படுகிற கணிப்பு
கூடுமானவரையில் மிகச் சரியாகவே இருக்கும்

நானும் கூடுமானவரையில் சில சமூக
இயக்கங்களில் சங்கங்களில் சம்பந்தப்பட்டதால்
பல்வேறு நிலைகளில் உள்ள மக்களை
அன்றாடம் சந்திக்கவேண்டிய சூழலில்
எப்போதும் இருப்பேன்

அன்று முதல்வர் புரட்சித் தலைவி அவர்கள்
உடல் நிலை சௌகரியம் இன்றி
மருத்துவமனையில் சேர்க்கப்பட்டது முதல்
இறுதி வரை யாருமே பார்க்க அனுமதிக்கப்படாமல்
இர்கசியம் காத்தது தொடங்கி,

இராஜி ஹாலில் மொத்தக் குடும்பமும்
முதல்வர் மற்றும் முன்னணி அரசியல்
வாதிகளை எல்லாம் பின் தள்ளி
தேவுடு காத்தது ,

இறுதிச் சடங்கின் போது அவரது
அண்ணன் பையனையே பின் வரச் செய்து
தானே முன்னால் மதச் சடங்குகள் செய்து
அனைவரையும் அதிர்ச்சி கொள்ளச் செய்தது

சுடுகாட்டு மண் ஈரம் காயும் முன்
பொதுச் செயலாளர் பதவிக்கு
முயன்று காய் நகர்த்தியது,

முதல்வருக்கு எதிராக அமைச்சர்களை
தன்னை முதல்வர் பதவிக்கு முன் நிலைப்படுத்திப்
பேசவைத்தது

அடுத்து நடந்த சட்டமன்ற உறுப்பினர்களுக்கான 
கட்சிக்கூ ட்டத்தில்முதல்வரை ஒரு ஓரம் வைத்து
அவமானப்படுத்தியது,

தீர்ப்பு மிகச் சில நாளில் வருவது வரைக் கூடப்
பொறுக்காது முதல்வரை ராஜினாமா
செய்யச் சொல்லி கட்டாயப்படுத்தியது

இப்போது சட்டமன்ற உறுப்பினர்களிடம்
பேசுகையில் கொஞ்சம் கூடுதல் வன்முறைத்
தொனித் தெரியும்படிப் பேசியது

இவையெல்லாம் தொடர்ந்து திருமதி
சசிகலா அவர்கள் மீது அனைவருக்கும்
தைரியமானவர் என்பதை விட
திமிர் பிடித்தவர் எனத்தான் எண்ண வைத்துப்
போனதைத் தவிர, தைரியமானவர் என்கிற
பிம்பத்தை உருவாக்கப் பயன்படவில்லை

இதே போன்று ஒரு நிலையை
ஜே ஜெ அவர்கள் செய்திருந்தால் அவர்களை
மிகத் துணிச்சல்காரர் என்கிற பிம்பத்தைக்
கூட்டுக் காட்டி இருக்கும்

காரணம் அவர் மிகப் பெரும் சோதனைகளை
மக்கள் மற்று தொண்டர்களிடம் இருந்த
செல்வாக்கின் காரணமாக
அந்த ஆணவம் பிடித்தவர் என்கிற பிம்பத்தை
உடைத்து துணிச்சல் மிக்கவர் என்கிற
பிம்பத்தை உண்டாக்கி இருந்தார்

என்வே அவர் எதைச் செய்தாலும் அது
அவர் அவர் குறித்து உண்டாக்கி வைத்திருந்த
பிம்பத்தைக் கூட்டிக் காட்டுவதாக் இருந்தது

மாறாக சசிகலா அம்மையாரைப் பொருத்தவரை
மிகச் சரியாகச் சொன்னால் ஜேஜே அவர்களின்
அரசியல் சரிவுக்கு எல்லாம் சசிகலா அவர்களும்
அவர்களது குடும்பத்தார் அனைவரும்தான்
காரணம் என்கிற அசைக்கமுடியாத கருத்து
அனைத்துத் தரப்பு மக்களிடம் இருக்கிற காரணத்தால்

இவர் செய்கிற துணிச்சசலான நடவடிக்கை எல்லாம்
அவர் அவர் குறித்து உண்டாக்கி வைத்திருக்கிற
சூனியக்காரி என்கிற பிம்பத்திற்குத் தான்
வலுசேர்த்துப்போகிறது

இனித் திரும்பமுடியாத அளவு தவறானபாதையில்
வெகு தூரம் வந்து விட்டதால்
இனி சரிவை மட்டுமே சசிகலா அவர்கள்
சந்திக்க நேரிடும் என்பதே நான் சந்தித்த
அனைத்துத் தரப்பு மக்களிடமும் இருக்கிற
திட்டவட்டமான அபிப்பிராயம்

இந்த நிலையில் ஆளுநரின் முடிவு எப்படி
இருக்கும் அல்லது எப்படி இருந்தால் அது
மக்களின் மன நிலையைப் பிரதிபலிப்பதாக இருக்கும் ?

சக்திவாய்ந்த புரட்சித் தலைவியின்
இயக்கம் இந்த நிகழ்வுகளுக்குப் பின்
என்னவாகும் ?

(சசி  மேடம்  உங்களுக்கு ஒரு சிறு வேண்டுகோள்

நீங்கள்  உயிரைக்  கொடுத்தெல்லாம்  கட்சியை
காப்பாற்ற வேண்டாம் . நீங்களும் உங்கள்
குடும்பமும்  ஒதுங்கினாலே  கட்சி
நிச்சயம் உச்சம் தொடும் )

மக்கள் கருத்தின் அடிப்படையில் அது அடுத்தப்
பதிவாகத் தொடரும்

Saturday, February 11, 2017

பன்னீரா...கழிவு நீரா

வழக்கம்போல்
குழம்பி இருக்கிற குட்டையை
மீன் பிடிக்கத் தெரியாதவர்கள்தான்
மீன் பிடிக்க முடியாதவர்கள்தான்
அதிகம்  குழப்புகிறார்கள்

பந்திக்கே அழைக்கப்படாதவர்கள்தான்
இலைப்பீத்தல் என்று
அதிகம் அங்களாய்க்கிறார்கள்

நாம் தெளிவாய் இருப்போம்

இன்றைய நிலையில்
பூதாகாரமான
கேள்விக்கான பதில்
இரண்டில் ஒன்றுதானே ஒழிய

இரண்டும் அல்லது
இரண்டுமல்ல
என்பதல்ல

இரண்டில்
நிச்சயம் வேண்டாதது எது
சகித்துத் தொலைக்கவேண்டியது
என்பதுதானே ஒழிய

இரண்டையும்
ஒழிப்பதல்ல
இரண்டையும் ஆதரிப்பதுமில்லை

மூன்றாவது
இரண்டில் ஒன்றை
சில காலம் ஆதரிப்பதன் மூலம்

முதலாவதாக
நிச்சயம் வாய்ப்புண்டு

அதற்கும் தேவை
பொறுமையும்
அரசியல் சாதுர்யமுமே

பார்ப்போம் .....

Friday, February 10, 2017

திருமதி சசியும் பிரேக் இல்லா வண்டியும்

" பிரேக் " பிடிக்காத வண்டியில்
வீடு போகும் சூழ் நிலை நேரின்
மெதுவாகச் செல்லுதலே
புத்திசாலித்தனம்

மாறாக
விபத்து நேரும் முன்
வீடு செல்லவேண்டும் என
விரைந்து ஓட்டுபவன்
நிச்சயம்
வடிகட்டிய முட்டாளே

தீர்ப்பு
வெளியாக இருக்கிற சூழலில்
அதை எதிர்பார்த்துப்
பொறுத்திருத்தலே
புத்திசாலித்தனம்

மாறாக
தீர்ப்பு வரும் முன்
பதவியை அடைந்துவிடவேண்டும்
என வெறி கொள்பவரும்
நிச்சயம்
வடிகட்டிய முட்டாளே

முன்னதில்
விபத்து நேரவே
அதிக வாய்ப்பு

பின்னதில்
வெறுப்புக் கூடவே
அதிக வாய்ப்பு

போதனைகள்
போதை கொண்டவர்களிடம்
செல்லுபடியாவதில்லை
அனைவரும் அறிந்ததுதான்

இருப்பினும்
பதிவின் மூலம்
" நீர்த் " தெளித்து வைப்போம்

தெளிந்தால்
தெளியட்டும்

இல்லையேல்

இருப்பதையும் இழந்து
அடியோடு
ஒழிந்தால்
ஒழியட்டும்

பணிவிற்கு இலக்கணமாய் இருந்த ஓ.பி.எஸ் அவர்களை.....,

இன்று தமிழகம் காணும் அனைத்து
அவலங்களுக்கும் அசிங்கங்களுக்கும்
அனைத்து நிலைகளில் உள்ளவர்களிடமும்
பொறுப்பின்மையும் பொறுமை இன்மையும்
நிறைந்திருப்பதே முழுமையான காரணம்

பந்தியில் பரிமாறிக்கொண்டிருக்கும் போதே
அள்ளித் தின்னத் துவங்கும் பாமரனுக்கும்
காரியம் கைகூடிவரும் வேளை வரும்வரை
பொறுத்துக் கொள்ள முடியாத
தன்மையுடையவர்களுக்கும்
நிச்சயம் அதிக வித்தியாசமில்லை

தனித் தலைமைத் திறமும்,அசாத்தியத்
துணிச்சலும்,மக்கள் செல்வாக்குப் பலமும்
கொண்டிருந்த தலைவியை ஒரு இயக்கம்
இழக்கையில், ஒரு தடுமாற்றம்,சிறு தத்தளிப்பு
நேருதல் என்பது இயற்கையே

அதுவும் மிகச் சாதுர்யமாய்,அனைவரும்
ஏற்றுக் கொள்ளும்படியாக அடுத்த நிலைத்
தலைவர்கள் உருவாகிவிடக் கூடாது என
கங்கணங்கட்டிக் கொண்டு அரசியல் நிகழ்வுகளைக்
கையாண்ட ஒரு இயக்கத்தில்
நிச்சயம் இது கூடுதல் சாத்தியமே

புரட்சித் தலவருக்குப் பின்
புரட்சித் தலைவரைப் போல் வெகு ஜனமக்களின்
பேராதரவைப் பெற்றவர்கள் அ.இ.அ.தி.க வில்
இல்லை.இப்போது பொறுப்பில் இருப்பவர்கள்
எல்லாம் ( மந்திரிகள் என்பதால்
தமிழகம் முழுமைக்கும் )
அந்த அந்த மாவட்ட அளவில்
அறியப்பட்டவர்களாகவே இருக்கிறார்கள்

மாறாக இருமுறை முதல்வராக இருந்ததால்
மரியாதைக்குரிய ஓ.பி.ஸ் அவர்கள் மட்டும்
கட்சிக் கடந்து மாநிலம் முழுமைக்கும்
அறியப்பட்டவராக இருக்கிறார்.

(அறியப்பட்டவராகத்தான்.செல்வாக்கு உடையவராக
இல்லை என்பதுவும் உண்மை )

அதனால்தான்
அவர் மீண்டும் முதல்வராக முன்மொழியப்பட்டது
உறுத்தல் இல்லாத விஷயமாகப்பட்டது

அதனால்தான் எடப்பாடி அவர்களின் பெயர்
முதல்வர் பதவிக்கென முன்மொழியப்படுவதாக
தகவல் வர அது பொது ஜனங்களுக்கு அத்தனை
விருப்பமான விஷயமாகப்படவில்லை

அதைப் போலவே கட்சியின்
பொதுச் செயலாளராக திருமதி சசிகலா அவர்கள்
பதவி ஏற்றுக் கொள்ளுகையில்.
புரட்சித் தலைவியின் அரசியல் வாழ்வில் ,சரிவும்
களங்கமும், திருமதி சசிகலா அவர்களாலும்
அவர்களது குடும்பத்தாரினாலும்தான் ஏற்பட்டது
என்கிற எண்ணம் திண்ணமாக அனைவரிடத்தும்
இருந்ததால்,கட்சியின் அடிமட்டத் தொண்டர்கள்
மற்றும் பொது ஜனங்கள் எல்லாம் அதை ஒரு
கசப்பான விஷயமாகவே கருதினார்கள்

ஆயினும் அது கட்சி சம்பந்தப்பட்ட விஷயம்
என்கிற அளவில் விருப்பமில்லை என்றாலும்
பல்லைக் கடித்தபடி விழுங்கியும் தொலைத்தார்கள்

நிச்சயம் இந்த கசந்த உணவு
செரிக்கும்வரையாவது  கொஞ்சம் பொறுமையைக்
கையாண்டிருந்தால் நிச்சயம் இத்தனை
அவலங்கள் நேர்ந்திருக்க வாய்ப்பில்லை

மாறாக முதல்வராக பொறுப்பேற்ற மதிப்பிற்குரிய
ஓ.பி.எஸ் அவர்கள் அவரது முதல்வர் பொறுப்பில்
ஏற்பட்ட அசாதாரணமான சூழலை பொறுமையாய்
பொறுப்பாய் சமாளித்த விதம்...

அறியப்பட்டவராய் மட்டுமே இருந்தவர்
மதிக்கத் தக்கவராய், தன்னிகரற்ற தலைவராய்
மாறிவிடுவாரோ என ஏற்பட்ட அச்சமே

அவரை அசிங்கப்படுத்தும் விதமாக,அலட்சியப்
படுத்தி அவ்மானப்படுத்தும் விதமானச் செயல்களைச்
செய்யும்படியான  பிறழ்மன நிலையை திருமதி.
சசிகலா அவர்களுக்கு உண்டாக்கிவிட்டது

அந்த முதிர்ச்சியற்ற, தலைமைப்பண்பற்ற
அடாவடிச் செயல்களே

தன் பதவியின் மதிப்பு மறந்து காலில்விழுந்து
ஆசிப்பெற்ற பணிவிற்கு  இலக்கணமாய் இருந்த
ஓ.பி.எஸ் அவர்களை,தலை நிமிரச் செய்திருக்கிறது
சரி நிகராய் சமர் செய்யவும் செய்திருக்கிறது
என்றால் அது மிகை இல்லை

இது எப்படி முடியும் ? அல்லது
முடிய வேண்டும்

(அடுத்த பதிவில் )

Thursday, February 9, 2017

முக்கியம்விஷயம் மட்டும் இல்லை அதைக் கொடுக்கும் விதமும்...

தொலைக்காட்சியில் விவாத மேடையில்
பேசுபவர்கள் எல்லாம் பேசுகிற பொருள் குறித்து
அந்தப் பொருள் குறித்து
அவர்கள் சார்ந்திருக்கிற இயக்கங்களின்
கொண்டிருக்கிற கருத்துக் குறித்தெல்லாம்
தெளிவாகப் பேசுகிறார்கள்

ஆனால் விவாதிப்பது எப்படி என்று
மட்டும் தெரியாமல் பேசுவது
பார்க்கவும் கேட்கவும் எரிச்சலூட்டுகிறது

முதலில் இதுபோல் நிகழ்ச்சிக்கு
அழைப்பவர்களை பிரபலமானவர்களா
எனப் பார்க்காமல்,விவாதித்தல் குறித்த
அடிப்படை அறிவுள்ளவர்களா எனப்
பார்த்து தேர்ந்தெடுத்தல் நல்லது

தெருவோரக்கடைக்கும்,
ஐந்து நட்சத்திர ஹோட்டலுக்கும் உள்ள
வித்தியாசம் ருசி, என்பது மட்டும் இல்லை
அதை விட உணவைக் கொடுக்கும்
விதமும்  மிக மிக முக்கியம் இல்லையா ?

அன்னியர்கள் பிரவேசிக்கக் கூடாது
அல்லது அனுமதிப் பெற்று வரவும்
என எழுதப்பட்ட சமையலறையுள்
எட்டிப்பார்த்தோம் எனில்....

அந்தச் சூழலையும் வேர்வையில்
குளித்து வெற்று உடம்புடன் இருக்கும்
சரக்குமாஸ்டரையும் தோசை துடைப்பத்தையும்
பார்த்தோமெனில், நிச்சயம் நெய்ரோஸ்ட்
கசக்கவே செய்யும்.. முக்கியம்

மாறாக டிப்டாப்பாக உடையணிந்து
மிகப் பவய்மாய் பறிமாறும் சர்வரை
தோசை ஊற்றச் சொல்வோமெனில்
நிச்சயம் நெய்ரோஸ்ட் வாயில் வைக்க
விளங்காதுதானே ?

அதைப்போலத்தான் இதுவும்....

நமக்குத் தேவை
விஷயம்  மட்டும்  இல்லை
அதைக் கொடுக்கும் விதமும்...முக்கியம்

நிகழ்ச்சி ஏற்பாடு செய்வோர் இனியேனும்
கவனம் கொள்வார்களா ?

Wednesday, February 8, 2017

எதிரில் இருப்போனிடம் சிறப்புக்கள் இருப்பினும் முறைத்தே நகரவும்....

முதல்வரே நீர்
எதிர்கட்சித் தலைவரைப் பார்த்து
முறைத்திருக்கலாம்
முகம் சுழித்திருக்கலாம்
அல்லது
முடியுமானால்
பல்லை நற நறவெனக்
கடித்திருக்கலாம்

மாறாக

இப்படிச் சிரித்துத் தொலைத்து
நம் பண்பாடு மறந்தீரே
நம் கலாச்சாரம் மறந்தீரே

அதனால்
பதவியையும்
இழக்க இருக்கிறீர்களே

தன் மனைவியைக்
கவர்ந்து சென்றவன் ஆயினும்
ஆயுதங்களை இழந்து நிற்கையில்
இன்று போய் நாளை வா
எனச் சொன்னவர்
நம்மவரில்லை

இறுதி அஞ்சலிக்கு
முதல்வரும்
எதிர்கட்சிக்காரரும்
சேர்ந்து வரும் அநாகரீகம் ( ? )
நிச்சயம் பண்பாட்டுச் சூழலுக்கு
உகந்ததே இல்லை

இதனை மறந்து
எதிராக இருப்பதால்
எதிரி இல்லை என நினைத்துச்
சிரித்துத் தொலைத்தீரே
முதல்வரே
அதனால்
பதவியையும்
இழந்துத் தொலைத்தீரே

இனியேனும்...............
உடன் இருப்போன்
துரோகியாயினும்
சிரித்து வைக்கவும்

எதிரில் இருப்போனிடம்
சிறப்புக்கள்  இருப்பினும்
முறைத்தே   நகரவும்

அதன் மூலம்
நம் பண்பாடும்
தொடர்ந்து
நிலைக்கவும்  செழிக்கவும் ( ? ) ......

Tuesday, February 7, 2017

பன்னீரும் வெந்நீர் ஆனது...

மக்களின் எண்ணங்களை
அவர்தம் உணர்வுகளை
எது எதற்கோ சோரம்போய்

அரிதில் கடத்திகளாகச்
செய்தித் தாள்களும்
ஊடகங்களும் ஆகிப்போனதால்தான்

முக நூல் சுவர்களும்
வாட்ஸப்  திண்ணைகளும்
பதிவர் மேடைகளும்

உண்மைக் கடத்திகளாக
எளிதில் கடத்திகளாக
ஆகிப் போனதால்தான்

இளைஞர்களின்
எழுச்சியும் சாத்தியமானது

மெரினாவும்
மக்கள் சதுக்கமானது

ஜல்லிக்கட்டும்
சாத்தியமானது

அதன் தொடர்ச்சியாய்
இன்று பன்னீரும் வெந்நீர் ஆனது

இனிப் படிப்படியாய்
கபட வேடதாரிகளின்
வேஷம் நிச்சயம் கலையும்

இனிப் படிப்படியாய்

"போலித் தலைமைகளின் "
தான்தோன்றித்தனங்களும்
நிச்சயம் மண்ணைக் கவ்வும்

அதற்காகவேணும்

நாட்டு நடப்பினில் கூடுதல்
கவனம் கொள்வோம் வாரீர்

மனதில் பட்டதை நேர்மையாய்த்
தொடர்ந்து எழுதுவோம் வாரீர் 

Sunday, February 5, 2017

எழுதிக் கொண்டே இருப்போம்

எழுதிக் கொண்டே இருப்போம்--நாம்
எழுதிக் கொண்டே இருப்போம்

வலிமை கொண்டு அதர்மம்-இங்கு
எளிதாய் வெல்லும் சூழல்
அழிவு காணும் வரையில்--முழுதாய்
அடங்கி ஒடுங்கும் வகையில்      (எழுதிக் )

எளிமை தூய்மை  எல்லாம் _இங்கு
ஏற்றம் கொள்ளும் சூழல்
நிலையாய் ஆகும் வரையில்-என்றும்
நிலைத்து வாழும் வகையில்     (எழுதிக் )

பொய்மைப் போலி எல்லாம்--இங்குத்
தலைமை ஏற்கும் சூழல்
நைந்து போகும் வரையில்-முழுதாய்த்
தொலைந்துச் சாகும் வகையில்   (எழுதிக் )

உண்மை நேர்மை எல்லாம்--இயல்பாய்
ஏற்றம் கொள்ளும் சூழல்
திண்மை கொள்ளும் வரையில்--நல்லோர்
துணிவு கொள்ளும் வகையில்    (எழுதிக் )


Saturday, February 4, 2017

பல்லவிக் கிடைத்தப் புலவன் போல.....

பல்லவிக்  கிடைத்தப்  புலவன் போலப்
பாடிக் களிக்கிறேன்-பந்தய
எல்லையைத் தொட்ட வீரன் போல
தாவிக் குதிக்கிறேன்
கருவிழி பார்த்தப்  பார்வை ஒன்றில்
கவிழ்ந்து போகிறேன்-உன்
ஒருமொழி கேட்டக்  கணத்தில் நானும்
கவிஞன்  ஆகிறேன்

நிலவு கூட நெருங்கி வந்து
சொந்தம் கொள்ளுதே -சோலை
மலரும் கூட மணந்து எனக்கு
பந்தம் என்குதே
மனமும்  கூட எல்லை கடந்து
எங்கோ பறக்குதே-அடக்
கனவு போல கவிதை நூறு
தானாய்ச்  சுரக்குதே

உணவை நீரை மறுத்த உடலும்
சக்தி கொள்ளுதே -உன்
நினைவு ஒன்றே போதும் என்று
மனதும் சொல்லுதே- உன்
நினைவும் கனவும் கலந்த நிலையில்
சொர்க்கம் தெரியுதே -அந்த
நிலையில் உதிர்க்கும் உளறலை உலகம்
கவிதை என்குதே

பொன்னும் பொருளும் கோடி வந்து
என்னைச் சேரலாம்- இந்த
மண்ணே என்னை மன்னவ னாக்கி
மகிழ்ந்தும் போற்றலாம்-உன்
மடியில் துயிலும் ஒர் நொடி அதற்கு
இவைகள் ஈடாமோ-அந்தத்
துடிப்பைச் சொல்லும் கவிதை இதற்கு
என்றும்  நிகராமோ

Friday, February 3, 2017

சிரிப்பின் சுகமறிவோம்

 சிரிக்கத் தெரிந்த பிறவி உலகில்
மனிதப் பிறவியே-இதை
அறிந்தும் இங்கு சிரிக்க மறுத்தல்
கொடிய  விந்தையே
இதழ்கள் வலிக்கச் சிரித்து விட்டால்
இன்பம் இன்பமே-எதையும்
இதயம் தன்னில் மூடி வைத்தால்
என்றும் துன்பமே

வளர்ந்த நிலவு வானில் இருந்து
மெல்லச் சிரிக்குமே-அதன்
அழகு சிரிப்பில் மயங்கி மலரும்
மணந்து சிரிக்குமே-அதன்
மணத்தில் மயங்கி சோலை யெல்லாம்
சொர்க்க மாகுமே-அந்த
உணர்வை உணர்ந்த மனிதர் மனத்தில்
மனிதம் பூக்குமே

குழந்தை மனதில் தெய்வம் இருந்து
சிரிப்பைத் துவங்குமே-அது
குழந்தை இதழில் மெல்ல வழிந்து
இல்லம் நிறைக்குமே-அந்த
அழகை உணர துன்பம் எல்லாம்
அழிந்து ஒழியுமே-இந்த
உலகே உண்மை சொர்க்க மென்று
புரிய லாகுமே

விழிகள் இரண்டும் காண வென்றே
அறிந்தி ருக்கிறோம்-கொண்ட
செவிகள் இரண்டும் கேட்க வென்றே
புரிந்தி ருக்கிறோம்-இனி
இதழ்கள் இரண்டும் சிரிக்க வென்றே
உணர்ந்து கொள்ளுவோம்-இதை
உலகு அறியச் சொல்லி நாமும்
உயர்வு கொள்ளுவோம்

Wednesday, February 1, 2017

சின்னச் சின்ன அடிகள் வைத்து

சின்னச் சின்ன அடிகள் வைத்து
சிகரம்  ஏறுவோம்
சிந்தை தன்னில் குழப்ப மின்றி
தொடர்ந்து   ஏறுவோம்

ஞாலம் என்னும் பூதம் கூட
துகளால் ஆனது
மாயம் செய்யும் காலம் கூட
நொடியால் ஆனது

சீறும் அலைகள் கொண்ட கடலும்
துளியால் ஆனது-இங்கு
காணும் பெரிய  பொருட்கள் எல்லாம்
அணுவா  லானது

வெற்றி பெற்ற மனிதர் என்றால்
இதனை அறிந்தவர்
பொத்தி நாமும் தூங்கும் போது
விழித்து எழுந்தவர்

முயலும் தோற்று ஆமை வென்ற
கதையைச் சொல்வதே -இந்த
ரகசி யத்தை நாமும் நன்றாய்ப்
புரிந்து கொள்ளவே

வானை முட்டி திமிராய் நிற்கும்
மலையைக் கூடவே
காணத் தெரியா சிறிய வேர்கள்
எளிதாய் உடைக்குமே

தொடர்ந்து முயன்றால் இந்த உலகில்
எல்லாம் முடியுமே-இதை
உணர்ந்தால் போதும் என்றும் வாழ்வில்
வெற்றி தொடருமே

ஜல்லிக்கட்டு.. ...போராட்டமும் முடிவும்

காலங்காலமாய்
துவக்கி வைத்துக் கொண்டிருந்தவர்கள்
அல்லது துவக்குவதாய்
நடித்துக் கொண்டிருந்தவர்கள்
அறியாமலேயே
இது துவங்கி இருந்தது

அவர்கள் அதிர்ச்சியுடன்
அதை எட்ட நின்றுக்
கவனித்துக்கொண்டிருந்தார்கள்

காலங்காலமாய்
தொடர்ந்து கொண்டிருந்தவ்ர்கள்
அல்லது
தொடர்பவர்களாக
நடித்துக் கொண்டிருந்தவர்கள்
தொடராமலேயே
அது மிகச் சிறப்பாய்த்
தொடர்ந்து கொண்டிருந்தது

அவர்கள் மிரட்சியுடன்
அதைக் கவனமாய்க்
கவனிக்கத் துவங்கினார்கள்

காலங்காலமாய்
வென்று கொண்டிருந்தவர்கள்
அல்லது
வென்றதாக நடித்துக் கொண்டிருந்தவர்கள்
இல்லாமலேயே
அது வெல்லத் துவங்கி இருந்தது

அவர்கள் அதிர்ச்சியுடன்
அது குறித்துச்
சிந்திக்கத் துவங்கினார்கள்

துவங்குவதும்
தொடர்வதும்
வெல்வதும்
சுயம்புவாய் ஆகக் கூடுமெனில்
நம் நிலை என்ன என்பது
அவர்களுக்குள்
ஒரு எரிமலையை உருவாக்க

அவர்கள் மீண்டும்
வழக்கம்போல
மெல்ல மெல்லத் துவங்கி
மெல்ல மெல்லத் தொடர்ந்து
முடிவாய்
வழக்கம்போல
முடித்தும் வைத்துவிட்டார்கள்

வழக்கமான
ஒரு போராட்டம் என்பதைப் போலவே

ஆயினும்........

Monday, January 30, 2017

ஒவ்வொரு நாளும் புதிதாய் பிறப்பெடுக்கும் வல்லமை....

தவறாது நித்தமும்
தீமைக்கு எதிரான
அணியினில் ஒரு துளியாய்
போராட்டத்தில் ஒரு குரலாய்
இலக்கியத்தில் ஒரு வரியாய்
ஏதும் முடியவில்லையெனில்
குறைந்த பட்சம்
அதற்கு எதிராக
ஒரு முகச்சுழிப்பை
பதிவு செய்தபடி
 நாம் தினமும்  கடந்து போவதால்

தவறாது நித்தமும்
சரியானவைகளுக்கு ஆதரவான
அணியினில் ஒரு துரும்பாய்
இயக்கத்தில் சிறு அலையாய்
பதிவுகளில் ஒரு எழுத்தாய்
குறைந்த பட்சம்
அதற்கு ஆதரவாய்
ஒரு சிறு புன்னகையை
பதிவு செய்தபடி
நாம் தினமும்  கடந்து போவதால்

ஒவ்வொரு நாளும்
திரு நாளைப் போல
மகிழ்வூட்டிப் போவதோடு

ஒவ்வொரு நொடியையும்
அர்த்தப்படுத்தியும்
அழகுப்படுத்தியும் போவதோடு

மிக நேர்த்தியாய்....
பாரதியின் கூற்றினைப் போல

ஒவ்வொரு நாளும்
புதிதாய் பிறப்பெடுக்கும்
வல்லமையும் தந்து போகிறது

உங்களைப் போலவே
எனக்கும் 

Sunday, January 29, 2017

வாழ்த்தி வளமாய் வாழ்வோம்..

எதிர்படும் எல்லோருக்கும்
வாழ்க வாழ்க வென்று
வாழ்த்துச் சொல்லியபடி நகர்கிறேன்

அதுவரை
வாட்டமுற்றிருந்த முகமெல்லாம்
மலரத் துவங்குகிறது

அதுவரை
மலர்ந்திருந்த முகமெல்லாம்
கூடுதல் அழகு பெறுகிறது

எதிர்படும் எல்லோரையும்
வெல்க வெல்க வென்று
உற்சாகப்படுத்திச் செல்கிறேன்

அதுவரை
துவண்டு கிடந்தவர்கள் எல்லாம்
துள்ளி எழத் துவங்குகிறார்கள்

அதுவரை
ஜெயித்து கொண்டிருந்தவர்கள்  எல்லாம்
கூடுதல் எழுச்சி கொள்கிறார்கள்

"இதனால் உனக்கென்ன நன்மை "
எரிச்சல்படுகிறான் நண்பன்

"வரவேற்பாளராய் இருந்து
சந்தனமோ பன்னீரோ தெளித்துப் பார்
அதிக மணம் உன் மேல்தான் இருக்கும் "
என்கிறேன்

 சரியாகப்  புரியாது விழிக்கிறான்
எப்போதும்
வாழ்த்தப் படுவதையே விரும்பும் அவன்

நேர்மறையும் எதிர்மறையும்

"எங்கும் இல்லை
 எதிலும் இல்லை
 எப்போதும் இல்லை
 எனவே
 நம்பிக்கைக் கொள்ளல்
 மடத்தனம் " என்றான் இவன்

"சரி " என்றேன் நான்

" எங்கும் இருக்கிறது
  எதிலும் இருக்கிறது
  எப்போதும் இருக்கிறது
  எனவே
  நம்பிக்கை கொள்வதே
  அறிவுடமை" என்றான் இவன்

"அதுவும் சரி " என்றேன் நான்

 உடன்
 முரண் கருத்துக் கொண்ட
 இருவரும் ஒன்றாகி
 என்னுடன் முரண்படத் துவங்கினர்

" இரண்டும் சரியாய் இருக்க
 எப்படிச் சாத்தியம்  ?
 ஒன்று மட்டுமே
 நிச்சயம் சாத்தியம்
 அது எது ? " என
 இருவரும் முகம் சுழிக்கத் துவங்கினர்

 இது எதிர்பார்த்ததுதான்
 எனவே நான் சங்கடப்படவில்லை

 இருவரையும் இமை மூடச் சொல்லி
 "இப்போது என்ன தெரிகிறது " என்றேன்

 முன்னவன்
 மெல்லச் சிரித்தபடி
 "எதுவும் இல்லை " என்றான்

 பின்னவன்
 "இருள் தெரிகிறது " என்றான்

 இப்போது
 நான் மெல்லச் சிரித்தேன்

 இருவரில் ஒருவன்
தெளிந்துச்  சிரிக்க

மற்றவன்  வழக்கம்போல்
குழம்பித் தவித்தான்  

Saturday, January 28, 2017

எவரை .ஆளவைப்பது எவரை வேகவைப்பது ...



எதைப் பறக்க வைப்பது
எதை  இறக்கி வைப்பது
காற்றுக்கு அது தெரியும்
பறக்க நினைப்பதுதான்
காற்றைப் புரிந்து  கொள்ளவேண்டும்

 எதனைமுளைக்கச் செய்வது
 எதனை மக்கச் செய்வது
மண்ணுக்கு அது தெரியும்
முளைக்க முயல்வதுதான்
தன்னுள் உயிர் கொள்ள வேண்டும்

எதனை   மிதக்கச் செய்வது
எதனை  மூழ்கச் செய்வது
நீருக்கு அது தெரியும்
மிதக்க நினைப்பதுதான்
தன்னை தகவமைத்துக் கொள்ளவேண்டும்

எதனை அணைத்து எரிப்பது
எதனை எரிக்காதுக்  கடப்பது
நெருப்புக்கு அது தெரியும்
நிலைக்க நினைப்பதுதான்
தன்னை திடப்படுத்திக் கொள்ளவேண்டும்

எதனைக் கடத்தி  ரசிப்பது
எதனை அழித்துச் சிரிப்பது
காலத்திற்கு அதுதெரியும்
காலம் கடக்க நினைப்பதுதான்
தன்னைத்  தகுதிப்படுத்திக்  கொள்ளவேண்டும்

எவரை  ஆளவைப்பது
எவரைப்   பொறாமையில்
வேகவைப்பது
அது  ஆண்டவனுக்குத் தெரியும்
நிலை மறந்ததுதான்  
தன்நிலை அறியப்    பயிலவேண்டும்

ஒரு வரிதான் ஆயினும் இதுவல்லவோ திருவரி...

நாவின்
மேற்புறம் பார்த்தே
உடலின் நோய்க்கூறுகளைக்
கணித்துவிடுகிறார்
திறமையான மருத்துவர்

குழந்தையின்
அழுகுரலின் தன்மையறிந்தே
குழந்தையின் தேவையைப்
புரிந்துகொள்கிறாள்
பாசம் மிக்க தாய்

நுனி நூலின்
தரம் அறிந்ததுமே
துணியின் தரத்தை
மதித்து விடுகிறார்
கைதேர்ந்த வியாபாரி

இளைஞனின்
பார்வை படியுமிடம் அறிந்தே
அவன் கண்ணியத்தை
அளந்து விடுகிறாள்
புத்திசாலிப் பெண்

படைப்பின்
வார்த்தைகளைக் கொண்டே
படைப்பாளியின் உள்மனத்தைச்
கணித்து விடுகிறான்
பண்பட்ட வாசகன்

"உள்ளத்தில் உண்மை ஒளி
உண்டாகின் அது
வாக்கினில் உண்டாம் "
இது ஒரு வரிதான் ஆயினும்
படைப்பாளிக்கு
இதுவல்லவோ திருவரி

Friday, January 27, 2017

பெரியகுளமும் மன்னர் குடியும்

எத்தனை உயரியப்
பதவியே ஆயினும்
எத்தனைச்
சிறந்த பொருளே ஆயினும்

நிழல் போல் உன்னை
விடாது தொடர
வேண்டுமாயின்

அதனை அடைவதற்கான
வரிசையிலும்
முயற்சியிலும் இரு

மிக முக்கியமாக
அதன் மீது அதீதப்
பற்றுக் கொள்ளாமலும்

 அடைந்தே தீர்வதென
புறக்கடை  வழிகளில்
முயற்சிகள்  செய்யாமலும்

அடைவதற்கென
செயற்கையான
புறவேஷங்கள்  புனையாதும் 

மிக முக்கியமாய்
அதனை அடைந்தால்
அதிகம் துள்ளாமலும்

மிக மிக முக்கியமாய்
அதனை இழந்தால்
துளியும் துவளாமலும்

மிகச் சுருக்கமாக
ஆரவார அலைகளற்ற
"பெரிய குளம்" போலவும்..

மாறாக..... அது
"மன்னர் குடியே " ஆயினும்
........................................................
....................................................
...........................................................

(தொடர வேண்டுமா என்ன ? )

Thursday, January 26, 2017

எங்கள் எளிய இனிய முதல்வரே

அமைதிக்கும்
இயலாமைக்கும்
வித்தியாசம் தெரியாதவனே
அமைதியைக்
குறைவாய் மதிப்பிடுகிறான்

பொறுமைக்கும்
எருமைமாட்டுத்தனத்திற்கும்
வித்தியாசம் தெரியாதவனே
பொறுமையைக்
குறைவாய் மதிப்பிடுகிறான்

பணிவிற்கும்
பயத்திற்கும்
வித்தியாசம் தெரியாதவனே
பணிவினைக்
குறைவாய் மதிப்பிடுகிறான்

அமைதியாய்
பொறுமையாய்
பணிவாய்
மிக மிக நேர்த்தியாய்
செயலாற்றும்

எங்கள் முதல்வரே
எளிய இனிய முதல்வரே

கடல் நீரை மறைத்திருக்கும்
பனிக்கட்டிகள்
கடலல்ல

இன்று
கட்சியைக் கைப்பற்றியவர்கள்
தொண்டர்களின்
மனப்பிரதிபலிப்புமல்ல

பதவியால் பெருமைகொள்பவர்கள் 
மக்களின்
மனமறிந்தவர்களுமல்ல

வெள்ளைக் கோழிக்கு
வர்ணம் பூசி
வெகு நாட்கள்
ஏமாற்றமுடியாது

மழை வந்தால்
அது வெள்ளைக் கோழியென
உலகுக்குத் தெரிந்துவிடும்

அப்படித்தான்
தேர்தல் வந்தாலும்....

இதுவரை
குடியரசு  நாளில்
எந்தத்  தமிழக  முதல்வரும் பெறாத
பேறு  பெற்றதுக்  கூட
அதிர்ஷ்டத்தினால்  அல்ல
அது
இறைவனின் ஆசியால் தான்

இனிய குடியரசு தின
நல்வாழ்த்துக்களுடன்...